तीन नर्सिंग विद्यार्थ्यांसह तीन वर्षांचा मुलगा कोरोना बाधीत

धुळे : शहरालगत शिक्षण घेणाऱ्या तीन नर्सिंगच्या विद्यार्थ्यांसह तालुक्यातील तीन वर्षाच्या मुलाला कोरोनाची लागण झाल्याचा अहवाल समोर आला. काही दिवसांपूर्वीच देवपूरमध्ये २४ वर्षांची विवाहीता कोरोनाबाधित आढळली होती. ही स्थिती पाहता धुळेकरांनी सतर्क राहून कोरोनासंबंधी नियमांचे पालन करावे, असे आवाहन यंत्रणेने केले. (Dhule-news-Three-year-old-Corona-infected-with-three-nursing-students)

शहरालगत मोराणे शिवारातील जवाहर मेडिकल फाउंडेशनच्या एसीपीएम लॅबमधील पाचपैकी चार अहवाल गुरूवारी पॉजिटिव्ह आले. यात उडाणे (ता. धुळे) येथील तीन वर्षाच्या मुलाला कोरोनाची बाधा झाली आहे. याबाबत हिस्ट्री जाणण्यासाठी संपर्क साधला असता आरोग्य यंत्रणेचा पालकांशी संवाद होऊ शकला नाही. तसेच मोराणे शिवारातील नर्सिंगचे तीन विद्यार्थी कोरोनाबाधित आढळले आहेत. त्यांची हिस्ट्री जाणली जात आहे. या विद्यार्थ्यांमध्ये एक वीस वर्षांचा, तर याच वयोगटातील दोन तरूणींचा समावेश आहे. या चौघांमुळे जिल्ह्याची दोन वर्षांतील बाधितांची एकूण संख्या ४५ हजार ८७९ झाली आहे.