Dhule : नगरसेविकेसह नागरीकांचा आयुक्‍त कार्यालयाबाहेर ठिय्या

धुळे : महापालिका आयुक्तांच्या कार्यालयाबाहेर प्रभाग क्रमांक एकच्या नगरसेविका वंदना संजय भामरे यांच्यासह गेल्या दोन ते अडीच वर्षांपासून महापालिका प्रशासनाच्या पायऱ्या झीजवणाऱ्या रमाई घरकुल योजनेच्या लाभार्थ्यांनी ठिय्या आंदोलन केले. या लाभार्थ्यांना पालिका प्रशासनाच्या दुर्लक्षित कारभारामुळे रमाई घरकुल योजनेपासून वंचित राहावे लागले असल्याचा आरोप यावेळी आंदोलकांनी केला आहे. (Dhule-corporation-news-ramai-gharkul-including-corporators-sit-outside-the-Commissioner's-office)

गेल्या महिन्यात देखील या लाभार्थ्यांनी पालिका आयुक्तांच्या कार्यालयाबाहेर प्रलंबित मागण्यांसाठी आंदोलन केले होते. त्यावेळी देखील पालिका प्रशासनतर्फे पुढील काही दिवसांत पालिका प्रशासनामार्फत सकारात्मक भूमिका घेतली जाण्याचे आश्वासन आंदोलकांना देण्यात आले होते. परंतु, तब्बल एक महिना उलटल्यानंतर देखील कुठल्याही प्रकारची हालचाल पालिका प्रशासनातर्फे करण्यात आली नसल्यामुळे पुन्हा एकदा पालिका आयुक्तांच्या कार्यालयाबाहेर या लाभार्थ्यांनी ठिय्या आंदोलन केले आहे.

ठोस भूमिका हवी

अनेकदा आंदोलन करून केवळ आश्‍वासन मिळाले आहे. मात्र आश्‍वासनपुर्ती झाली नाही. यामुळे आता जोपर्यंत पालिका प्रशासन ठोस भूमिका बजावत नाही; तोपर्यंत हे ठिय्या आंदोलन सुरू ठेवण्याचा पवित्रा आंदोलकांनी घेतला आहे.