Dhule News : गणपती उत्सवाला परिवार पुण्याला; घरातून तीन लाखांच्या दागिन्यांसह रोकड लंपास

धुळे : घरी कुणीही नसताना चोरट्यांनी संधी साधली आहे. चोरट्याने बंद घराचा कडीकोंडा व कुलूप तोडून (Dhule) जवळपास तीन लाखांहून अधिकचा सोन्या-चांदीचे दागिन्यांसह दहा हजार रुपये रोकड चोरून पोबारा केल्याची घटना (Shirpur) शिरपूर येथील सुभाष कॉलनी येथे उघडकीस आली आहे. (Live Marathi News)

शिरपूर येथील सुभाष कॉलनीत घरमालक हे पुण्याला गणपती उत्सवानिमित्त गेले होते. संपूर्ण परिवार पुण्याला (Pune) गेला असल्याने त्यांच्या घराला कुलूप लावलेले होते. हि संधी साधत चोरट्यांनी घराचे कुलूप तोडून घरातून दागिने व रोख रक्कम लांबविली आहे. शेजारच्यांना अचानकपणे घराचे कुलूप बाजूला पडलेले व घराचा दरवाजा उघडा अवस्थेमध्ये आढळून आला. याबाबत शेजारच्यांनी तात्काळ संबंधितांना फोन करून त्यांच्या घरात चोरी झाली असल्याची माहिती दिली. त्यावरून शिरपूर पोलिसात या संदर्भात तक्रार दाखल करण्यात आली.  

घरफोडीमध्ये जवळपास तीन लाख रुपयांचे सोन्याचे दागिने चोरट्यांनी लंपास केले असून, त्यात दहा हजार रुपये रोकड देखील चोरट्यांनी लंपास केली आहे. चोरी संदर्भातील तक्रार शिरपूर पोलिसात दाखल झाल्यानंतर शिरपूर पोलिसांनी श्वानपथकासह इतर तपास यंत्रणांबरोबर तपास करून चोरट्यांचा शोध सुरू केला आहे.