Dhule Crime : धुळ्यात रात्रीचा थरार.. कुटुंबीयांवर रोखली बंदुक; साडेतीन लाखांहून अधिकचा ऐवज घेऊन चोरटे पसार

धुळे : धुळे शहरातील जामचा मळा येथील सुलतानया मदरसा परिसरात रात्रीच्या वेळी चोरट्यांनी धुमाकूळ घातला. घरात प्रवेश करत कुटुंबियांच्या डोक्याला बंदूक लावून घरातील सोन्या- चांदीचे दागिने लुटून पोबारा केल्याची घटना घडली आहे, या घटनेने परिसरात खळबळ उडाली असून नागरिकांमध्ये घाबरत पसरली आहे. 

धुळे (Dhule) शहरातील रात्रीच्या वेळी हि थरारक घटना घडली आहे. चोरट्यांनी मागच्या दरवाजाने घरात प्रवेश केला व घरात असलेल्या महिलेला बंदुकीचा धाक दाखवून घरातील सोने-चांदीचे दागिने व पैसे कुठे ठेवले असे विचारणा केली. यानंतर या चोरट्यांनी घरात असलेल्या कपाटात तपासणी केली असता जवळपास साडेतीन लाखांहून अधिकचे सोन्या चांदीचे दागिने चोरून नेले. तसेच कोणालाही याबाबतची वाच्यता न करण्याची धमकी महिलेला दिली. त्यानंतर जाताना महिलेच्या अंगावरील सोन्या-चांदीचे दागिने देखील घेऊन (Theft) चोरट्यांनी पोबारा केला आहे,

चोरटे पसार झाल्यानंतर महिलेची आरडाओरड 
यासंदर्भात चोरट्यांनी सर्व दागिने घेऊन पलायन केल्यानंतर महिलेने आरडाओरड करत कुटुंबीतील इतर सदस्यांना उठवित घटनेची माहिती दिली. त्यानंतर घटनेची माहिती पोलिसांना देण्यात आली असता पोलिसांनी घटनास्थळी येत सर्व हकीकत जाणून घेतली. या संदर्भात पोलीसात तक्रार दाखल करण्यात आल्यानंतर पोलीस प्रशासनातर्फे पुढील तपास करण्यात येत आहे.