Dhule Accident: दिवाळीच्या तोंडावर कुटुंबावर दुःखाचा डोंगर; अपघातात दोन तरुणांचा मृत्यू

सोनगीर (धुळे) : कामावरून घराकडे परतणाऱ्या तरुणांच्या दुचाकीला अज्ञात वाहनाने जोरदार धडक दिली. या अपघातात (Accident) मोटारसायकलवरील दोन तरुण जागीच ठार झाले. तर एक गंभीर जखमी झाला. (Dhule) ही घटना बाभळे (ता. शिंदखेडा) फाट्याजवळ घडली. (Live Marathi News)

नरडाणा औद्योगिक विकास केंद्रातील बेदमुथा कंपनीतून रात्री सुटी झाल्याने उमेश सुभाष कुवर (वय २९, रा. डोंगरगाव, ता. शहादा, जि. नंदुरबार), निखिल आनंदा पाटील (३०, रा. मांडळ, ता. शिंदखेडा) व अमोल संजय भदाणे (रा. मंगरूळ, ता. अमळनेर, जि. जळगाव) हे तिघे मोटारसायकलने सोनगीरला (Songir) येत होते. मात्र, बाभळे फाट्याजवळ अज्ञात वाहनाने त्यांच्या दुचाकीला मागून जोरदार धडक दिल्याने उमेश कुवर व निखिल पाटील जागीच ठार झाले. अमोल भदाणे गंभीर जखमी झाला. त्याला पुढील उपचारासाठी धुळ्यातील शासकीय रुग्णालयात दाखल करण्यात आले. 

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

कुटुंबीयांचा आक्रोश 

दिवाळी सण तोंडावर असताना कमावत्या तरुणांचा अपघात झाल्याने त्यांचे कुटुंब शोकसागरात बुडाले. उमेश कुवर येथील बालाजीनगरात राहत होता. त्याच्या मागे दोन वर्षांचा मुलगा, पत्नी, आई, वडील, एक भाऊ असा परिवार आहे. निखिल पाटील अविवाहित असून, वालखेडा (ता. शिंदखेडा) येथे राहत होता. त्याच्या मागे एक भाऊ, आई असा परिवार आहे. उमेश कुवर व निखिल पाटील यांच्या मृत्यूची बातमी कळताच सोनगीर ग्रामीण रुग्णालयात नातेवाइकांनी एकच गर्दी केली. शिंदखेडा पोलिस ठाण्यात अपघाताची नोंद झाली.