Satara News : डॉक्टर महिला बीडची असल्याने वरिष्ठ पोलीस अधिकाऱ्यांनी तक्रारी डावलल्या? माजी मंत्री धनंजय मुंडेंचा गंभीर आरोप

मूळच्या बीडच्या असलेल्या डॉक्टर महिलेने साताऱ्यात पोलीस उपनिरीक्षकाच्या जाचाला कंटाळून आत्महत्या केल्याने महाराष्ट्र हादरला आहे. डॉक्टर महिलेने ४ महिन्यांपूर्वी होत असलेल्या जाचाविषयी वरिष्ठ पोलीस अधिकाऱ्यांना तक्रारी दिल्या होत्या. मात्र, डॉक्टर महिलेच्या आरोपांवर दुर्लक्ष करण्यात आलं. आरोपी पीएसआय गोपाल बदनेचा त्रास असह्य झाल्यानंतर डॉक्टर महिलेने आयुष्य संपवल्याचं समोर आलं आहे. या प्रकरणात आता माजी मंत्री धनंजय मुंडे यांनी गंभीर आरोप केला आहे.

माजी मंत्री धनंजय मुंडे यांनी सोशल मीडियावर पोस्ट करत मृत डॉक्टर महिलेला श्रद्धांजली वाहिली. त्यानंतर स्वतंत्र एसआयटी नेमून चौकशीची मागणी केली. यावेळी डॉक्टर महिला बीडची असल्याने तक्रारी डावलल्याचाही आरोप माजी मंत्री धनंजय मुंडे यांनी केला.

माजी मंत्री धनंजय मुंडे यांनी पोस्ट करत म्हटलं की, सातारा जिल्ह्यातील फलटणमध्ये रुग्णसेवेत असलेल्या व मूळच्या बीड जिल्ह्यातील वडवणी तालुक्यातील महिला डॉक्टर यांच्याबाबत घडलेली घटना अत्यंत दुर्दैवी आहे. माझ्या या डॉक्टर भगिनीला भावपूर्ण श्रद्धांजली. तिच्या अकाली निधनाने कुटुंबियांवर कोसळलेल्या दुःखात सहभागी आहे. या प्रकरणातील दोषींना कठोर शासन व्हावे, तसेच डॉक्टर महिला ही मुंडे आहे आणि बीडची आहे म्हणून तिने केलेल्या तक्रारी वरिष्ठांनी डावलल्या असतील तर हे अतिशय गंभीर आहे'.

'साताऱ्यातील डॉक्टर महिला आत्महत्या प्रकरणाची स्वतंत्र एसआयटी नेमून चौकशी करण्यात यावी तसेच हे प्रकरण जलदगती न्यायालयात चालवले जावे आणि दोषींना कडक शासन व्हावे, याबाबत राज्याचे मुख्यमंत्री महोदयांना उद्या पत्र देणार आहे, असे मुंडे म्हणाले.

साताऱ्यातील डॉक्टर महिलेच्या आत्महत्येमुळे राज्यभरात संतापाची लाट उसळली आहे. नागरिकांकडून आरोपींना कडक शिक्षेची मागणी केली जात आहे. तर पीडित डॉक्टर महिलेच्या नातेवाईकांनी आरोपींना फाशीची शिक्षा देण्याची मागणी केली आहे.