Ajit Pawar Health: जनतेपासून दूर रहावे लागणे त्रासदायक; अजित पवार पुन्हा एकदा विश्रांती घेणार

Ajit Pawar Health Update:

गेल्या काही दिवसांपासून आजारपणामुळे माध्यमांपासून दूर असलेल्या उपमुख्यमंत्री अजित पवार यांनी आपल्या प्रकृतीविषयी माहिती दिलीय. डॉक्टरांनी गर्दीच्या ठिकाणी न जाण्याचा तसेच मास्क वापरण्याचा सल्ला दिला आहे. यामुळे अजून काही विश्रांती घेणार, असल्याचं त्यांनी सांगितलंय. दिवाळीत अनेकांची भेट घेता येणार नसल्याचं दु:ख वाटत असल्याचं त्यांनी या  प्रसिद्धी पत्रकात म्हटलंय. (Latest News)

अजित पवार यांनी प्रसिद्धी पत्राद्वारे आपल्या प्रकृतीविषयीची माहिती आपल्या नातेवाईकांना आणि कार्यकर्त्यांना दिलीय. गेल्या काही दिवसांपासून मी डेंग्यूमुळे आजारी असून डॉक्टरांच्या सल्ल्याने उपचार घेत आहे. आजारामुळे अशक्तपणा, थकवा जाणवत असला तरी प्रकृतीत हळूहळू सुधारणा होत आहे. पूर्णपणे बरे होण्यास आणखी काही दिवस लागण्याची शक्यता आहे. डॉक्टरांनी गर्दीच्या ठिकाणी न जाण्याचा तसेच मास्क वापरण्याचा सल्ला दिलाय.

आजारपणामुळे आपल्या सर्वांपासून नाईलाजाने दूर रहावे लागणे हे त्रासदायक आहे. दरवर्षी दिवाळीत मी आपल्या सर्वांना भेटत असतो. दिवाळी पाडवा स्नेहमिलनाच्या निमित्ताने भेटीगाठी, शुभेच्छांची देवाण-घेवाण होत असते. यावर्षी पुढचे काही दिवस डॉक्टरांच्या सल्ल्यानुसार आपल्याला भेटता येणार नाही. परंतु माझ्या सदिच्छा कायम आपल्यासोबत आहेत.

आपल्या सर्वांना, आपल्या कुटुंबियांना, नातेवाईक आणि मित्र परिवाराला दिवाळीच्या मन:पूर्वक शुभेच्छा. ही दिवाळी आपल्या सर्वांच्या जीवनात आनंदाचा प्रकाश, धनधान्याची समृद्धी, उत्तम आरोग्य घेऊन येवो, अशी प्रार्थना करतो,” अशा शब्दात उपमुख्यमंत्री अजित पवार यांनी त्यांच्या प्रकृतीबद्दल माहिती दिली.

आजारपणामुळे डॉक्टरांच्या सल्यानुसार सक्तीची विश्रांती घ्यावी लागणार असल्याने आणखी काही दिवस जनतेला भेटता येणार नसल्याचे सांगत त्यांनी सर्वांना दिवाळीच्या शुभेच्छा दिल्यात.