Beed: धसांचे आरोप गंभीर, उच्चस्तरीय चौकशी करा; भाजप आमदारासाठी काँग्रेस नेते आले धावून, म्हणाले..

खोक्या प्रकरणाच्या आडून, माझ्या हत्येचा प्लॅन रचला होता, असा खळबळजनक आरोप आमदार सुरेश धस यांनी केला आहे. तसेच धनंजय मुंडेंचं नाव न घेता अप्रत्यक्षपणे त्यांच्यावर आरोप केले आहेत. धसांनी केलेल्या खुलाशावर काँग्रेस नेते विजय वडेट्टीवार यांनी प्रतिक्रिया दिली आहे. "सरकारने याची गंभीर दखल घेत, आरोपीवर कारवाई करण्यात यावी", असं वडेट्टीवार म्हणालेत.

विजय वडेट्टीवार नेमकं काय म्हणाले?

"धनंजय मुंडे आणि सुरेश धस हे दोघे सत्तेतील व्यक्ती आहेत. ते एकमेकांवर वारंवार आरोप करत आहेत. याचा अर्थ स्पष्ट होतो की गुंडगिरी करणारी माणसं आता सत्तेत आहे", असा आरोप विजय वडेट्टीवार यांनी केला आहे.

"धस यांनी केलेले आरोप अत्यंत गंभीर आहेत. उच्चस्तरीय चौकशी झाली पाहिजे", असं विजय वडेट्टीवार म्हणालेत. "तसेच राज्य सरकारने याची गंभीर दखल घ्यावी आणि आरोपींवर कारवाई करावी", अशी मागणीही विजय वडेट्टीवार यांनी केली आहे.

सुरेश धस नेमकं काय म्हणाले?

"सतीश भोसले प्रकरणाच्या आडून माझा खुनाचा प्लॅन रचला होता. बिश्नोई समाजाची लोक मुंबईत आणण्यात आली होती. त्यांना खोक्यानं धसांना हरणाचं मांस कसं पुरवलं, याबाबत सांगितलं. माझी हत्येचा कट आखला होता", असा आरोप सुरेश धस यांनी केला आहे.

मुंडेंवर घणाघाती टीका

"परळीचे मुंडे आष्टीत आले, सुरेश धसला खोक्यानं हरणाचं मांस पुरवलं, असं त्यांनी आष्टी मतदारसंघात सांगितलं", असा आरोप धनंजय मुंडे यांचं नाव न घेता धसांनी केला आहे. "१६ वर्षे मी माळकरी राहिलो आहे. पण डॉक्टरांनी सांगितल्यामुळे मी आता खातो. हरणाचं मांस खाण्यापर्यंत मी अजून गेलेलो नाही. मी प्राणी आणि पक्षी प्रिय आहे", असंही धस म्हणाले.

मुख्यमंत्र्यांरपर्यंत ही गोष्ट पोहोचवणार

"बिष्णोई समजाच्या दहा ते बारा लोकांना मुंबईत आणलं आणि त्यांना उपोषणाला बसवलं. त्यांना विमानाने आणलं आणि सांगितलं याप्रकरणावर बोलायचं. सुरेश धसला हरणाचं मांस खोक्याने पुरवले, असे दाखवण्याचाही प्रयत्न केला. त्यांनी माझ्या हत्येचा कट रचला. यात कोणाचा सहभाग आहे, हे मला ठाऊक आहे, ते देखील मी सांगेन. ही बाब मुख्यमंत्र्यांना सांगणार", असं धस म्हणालेत.