Maratha-OBC : राज्याचे मुख्यमंत्री चतुर आणि चाणक्य; काँग्रेस नेता असं का म्हणाला?

विजय पाटील, सांगली | साम टीव्ही

मराठा समाज आरक्षण जीआर आणि ओबीसींचा त्या जीआरला होणारा विरोध यावरून आता काँग्रेस नेते विजय वडेट्टीवार यांनी मुख्यमंत्री देवेंद्र फडणवीस यांच्यावर उपरोधिक टीका केली आहे. या राज्याचे मुख्यमंत्री चतुर, हुशार आणि चाणक्य आहेत. त्यांनी मराठा आणि ओबीसी समाजाला फसवण्याचं काम निश्चितपणाने केलेले आहे, असा आरोप त्यांनी केला.

मराठा समाजाला आणि ओबीसीला काय दिलं हेच कळत नाही. एकाने म्हणायचं मारल्यासारखं कर आणि दुसऱ्याने रडल्यासारखं करायचं आणि तिसऱ्यानं हसल्यासारखं करायचं, असं पद्धतशीर स्क्रिप्टेड काम राज्यामध्ये सत्ताधाऱ्यांकडून सुरू आहे. भविष्यात दोन्ही समाजाला ते कळेल, असं विजय वडेट्टीवार म्हणाले. ते सांगलीच्या कडेगावमध्ये स्वर्गीय पतंगराव कदम यांच्या लोकतीर्थ वर्षपूर्ती कार्यक्रमावेळी बोलत होते.

बाभळीच्या झाडाला दगड मारला की...

मराठा समाज आरक्षणासाठी सरकारने काढलेल्या जीआर (शासन निर्णय) वरूनही वडेट्टीवार यांनी निशाणा साधला. मराठा समाजाच्या जीआरचा अर्थच कळत नाही. बाभळीच्या झाडाला दगड मारला की आंबे पडले म्हणून ओरडतात. आणि जवळ गेले की काटे रूततात. आता जवळ कोण-कोण जातं, त्याला ते काटे रुतणार आहेत, असं वडेट्टीवार म्हणाले.

अजित पवारांची अधिकारी महिलेला तंबी, वडेट्टीवारांचं टीकास्त्र

कोण अधिकारी प्रामाणिक काम करत असेल आणि त्याला अशा प्रकारे धमकावून काम करून घेत असतील तर यावरून दिसतंय की यांना सत्तेचा माज आला आहे. सत्तेचा माज या प्रत्येकाला आला आहे. सत्ता म्हणजे मालक असं वाटू लागलं आहे. मालकी हक्काने सत्ता मिळाली असल्याचे वाटत आहे, असा घणाघात वडेट्टीवार यांनी केला.