नांदेडमध्ये काँग्रेसचा बैलगाडी मोर्चा; संयोजकांवर गुन्हा दाखल

नांदेड - नांदेडमध्ये काल काँग्रेस पक्षाच्या वतीने वाढत्या इंधन दरवाढीविरोधात बैलगाडी मोर्चाचे आयोजन करण्यात आले होते. मात्र, कोरोना नियमांना पायदळी तुडवल्याचा ठपका ठेवत संयोजकांवर गुन्हा दाखल करण्यात आला आहे. या मोर्च्यामध्ये अशोक चव्हाण यांचा देखील सहभाग होता. Congress bullock cart march in Nanded Filed a crime against organizers

हे देखील पहा -

नांदेड मध्ये काल काँग्रेस पक्षाच्या वतीने बैलगाडी मोर्चाचे आयोजन करण्यात आले होते. या मोर्च्याला काँग्रेस पदाधिकारी व कार्यकर्त्यांनी उत्स्फूर्तपणे प्रतिसाद दिला होता. काल या मोर्च्यास हजारोंच्या संख्येने काँग्रेस कार्यकर्ते उपस्थित होते. मात्र, कोरोना नियमांचे उल्लंघन केल्या प्रकरणी संयोजकांसह पाच जणांविरोधात वजिराबाद पोलिसात गुन्हा दाखल करण्यात आला आहे.

या बैलगाडी मोर्चात पालकमंत्री अशोक चव्हाण, आमदार अमर राजूरकर, आमदार माधवराव पाटील जळगावकर, आमदार मोहन हंबर्डे यांच्यासह हजारों काँग्रेसचे कार्यकर्ते मोर्चात सहभागी झाले होते. काल वंचित बहुजन आघाडीनेही कोविड नियमांचे उल्लंघन करणाऱ्या काँग्रेसच्या नेत्यांवर कारवाई करण्याची मागणी केली होती.

आज काँग्रेसचे जिल्हा सचिव उमाकांत पवार यांच्यासह पाच जणांवर गुन्हा दाखल करण्यात आला आहे. एकीकडे कोरोनाची तिसरी लाट उंबरठ्यावर असताना दुसरीकडे मात्र काँग्रेसने काढलेल्या मोर्चात नियमांचे सर्रास उल्लंघन केल्याने आश्चर्य व्यक्त केलं जातं आहे.

Edited By : Krushnarav Sathe