Accident News : इंजिन हवेत, चाक निखळले, भरधाव कार उलटली; भीषण अपघातात दोघांचा जागीच मृत्यू

छत्रपती संभाजीनगर : छत्रपती संभाजीनगर जिल्ह्यातील वैजापूर तालुक्यात एक भीषण अपघात झालाय. भरधाव कार उलटल्याने दोन तरुणांचा जागीच मृत्यू झाला. आज दुपारी छत्रपती संभाजीनगर जिल्ह्यातील वैजापूर तालुक्यात असणाऱ्या नांदगाव शिवारात आज दुपारी भरधाव कार उलटली. या अपघातात दर्शन पांडुरंग जगताप आणि राहुल राजाराम या दोघांचा मृत्यू झाला. हे दोघेही राहणार भग्गाव येथील रहिवाशी आहेत. अपघाताची घटना घडताच उपस्थितांनी त्यांना तात्काळ वैजापूर उपजिल्हा रुग्णालयात दाखल केले. मात्र, वैद्यकीय अधिकाऱ्याने तपासून त्या दोघांनाही मृत घोषित केलं आहे.

छत्रपती संभाजीनगरमधील वैजापूर तालुक्यात झालेला हा अपघात एवढा भीषण होता की, यात कारचं बोनेटमधील इंजिन आणि पुढचे दोन्ही चाक कारपासून वेगळे झाले. कारमधून इंजिन निघून ते पुढे काही अंतरावर जाऊन पढले. प्रत्यक्षदर्शीनी या अपघाताची आपबीती सांगितली.

नांदेड-हिंगोली सीमेवर ट्रॅक्टरचा भीषण अपघात

दरम्यान, नांदेड-हिंगोली सीमेवर आज ट्रॅक्टरचा भीषण अपघात झाला. या अपघातामुळे दोन जिल्ह्येच नाही तर अवघा महाराष्ट्र हळहळला. महिला शेत मजुरांना नेताना चालकांचं नियंत्रण सुटलं आणि ट्रॅक्टर थेट विहिरीत जाऊन कोसळलं. या अपघातात एकाच गावातील सात जणांचा मृत्यू झाला आहे. मिळालेल्या माहितीनुसार, हिंगोली-नांदेड जिल्ह्याच्या सीमेवरील आलेगाव येथे ट्रॅक्टर विहिरीत कोसळलं. हिंगोलीच्या वसमत तालुक्यातील गुंज गावातील शेतकरी महिला मजूर या ट्रॅक्टरमधून प्रवास करत होत्या. सर्व महिला मजूर हळद काढण्यासाठी ट्रॅक्टरमधून जात होत्या त्यावेळी अचानक अपघात झाला.

या अपघातात एकाच गावातील ७ महिलांचा मृत्यू झाला आहे. त्यामध्ये, हिंगोली जिल्ह्यातील गुंज गावालगतच्या वस्तीवरील एकाच कुटुंबातील दोन सुना पार्वती आणि सरस्वती या दोन सुनांना आपला जीव गमवावा लागला आहे. या घटनेनं गावावर आणि कुटुंबावर शोककळा पसरली असून लहान मुले आईच्या प्रेमाला पोरकी झाली आहेत.

हिंगोली जिल्ह्यातील गुंज गावालगतच्या वस्तीमध्ये शेतमजूर राहत होते. नेहमीप्रमाणे हे नागरिक शेतमजुरीचे काम करत असत आज सकाळी शेतातील कामानिमित्त ट्रॅक्टरमध्ये बसून हे मजूर जात होते. दरम्यान, गावापासून काही अंतरावर असलेल्या विहिरीमध्ये हे ट्रॅक्टर पडल्याने कामगार महिलांचा या अपघातामध्ये मृत्यू झाला आहे. विहिरीतून एकूण ७ मृतदेह आतापर्यंत बाहेर काढण्यात आले असून तीन जणांना वाचवण्यात स्थानिक आणि प्रशासनाला यश आलं आहे.