Chhatrapati Sambhajinagar News: सासरच्या त्रासाला कंटाळून महिलेचा २ मुलांसह आत्महत्येचा प्रयत्न, रडण्याचा आवाज ऐकून लोक धावले, मोठा अनर्थ टळला!

रामनाथ ढाकणे| छत्रपती संभाजीनगर, ता. २१ ऑगस्ट २०२४

पोलीस अधिकारी असलेल्या दिरासह सासरच्या त्रासाला कंटाळून एका महिलने २ मुलांसह रेल्वे रुळावर आत्महत्या करण्याचा प्रयत्न केल्याची धक्कादायक घटना छत्रपती संभाजीनगरमध्ये घडली. यावेळी मुलांच्या रडण्याचा आवाज ऐकून लोक धावले अन् मोठा अनर्थ टळला. या घटनेने परिसरात एकच खळबळ उडाली आहे.

दोन मुलांसह आत्महत्येचा प्रयत्न

याबाबत सविस्तर माहिती अशी की, छत्रपती संभाजीनगर शहरातील संग्रामनगर रेल्वे रुळावर आपल्या 2 मुलांना घेऊन एका महिलेने रेल्वेखाली आत्महत्या करण्याचा प्रयत्न केल्याची धक्कादायक घटना समोर आली आहे. डी.वाय.एस.पी असलेल्या दिरासह सासरच्या मंडळी कडून होणाऱ्या त्रासाला कंटाळून ही महिला रेल्वे रुळावर आपल्या 2 लहान मुलांना घेऊन गेली.

लोक धावल्याने मोठा अनर्थ टळला!

मात्र रडण्याचा आवाज ऐकू आल्याने काही समाजसेवक त्याठिकाणी धावून आले आणि त्यांनी महिलेला आत्महत्या करण्यापासून रोखले. यावेळी नागरिकांनी महिलेचे समुपदेशन करुन तिला पोलिसांच्या स्वाधीन केले त्यामुळे मोठा अनर्थ टळला.

दरम्यान, ही महिला याच कुटुंबातील एका व्यक्तीसोबत 2020 पासून लिव्ह इन रिलेशनशिपमध्ये राहत होती. डिव्होर्स झाल्याचे त्याने तिला खोटे सांगितले आणि वारंवार तिच्या चारित्र्यावर संशय घेऊन तिला त्रास देत होता. याच त्रासातून तिने आत्महत्येचा प्रयत्न केल्याचे सांगण्यात येत आहे. या धक्कादायक घटनेने परिसरात खळबळ उडाली असून पोलीस अधिक तपास करत आहेत.