Maratha Reservation: 'माझ्या लेकराला अन् समाजाला आरक्षण द्या', भावनिक चिठ्ठी लिहित मराठा तरुणाने संपवलं आयुष्य

रामनाथ ढाकणे, छत्रपती संभाजीनगर| ता. ४ जुलै २०२४

मराठा आरक्षणाच्या मागणीसाठी ४० वर्षीय कामगाराने गळफास घेत आत्महत्या केल्याची धक्कादायक घटना समोर आली आहे. छत्रपती संभाजीनगरमध्ये घडलेल्या या घटनेने सर्वत्र खळबळ उडाली असून आत्महत्या करण्यापूर्वी लिहून ठेवलेल्या चिठ्ठीमधून हा प्रकार उघडकीस आला आहे.

याबाबत सविस्तर माहिती अशी की, छत्रपती संभाजीनगर जिल्ह्यातील वाळूज औद्योगिक परिसरातील रांजणगाव शेणपुंजी भागात एका ४० वर्षीय कामगाराने गळफास घेतल्याची घटना घडली आहे. सोपान दशरथ सातपुते असे मृत व्यक्तीचे नाव आहे. सरकार समाजाला खेळवत असून माझ्या लेकरांना आणि समाजाला आरक्षण द्या असा मजकूर लिहिलेली एक चिठ्ठी देखील त्याच्याकडे आढळून आली.

याशिवाय जरांगे पाटील मराठा समाजाला आरक्षण मिळणार आहे का? असंही त्याने चिठ्ठीमध्ये लिहून ठेवले आहे. सोपान हे रांजणगाव भागात एका कंपनीत कामगार म्हणून काम करत होते घरी कोणी नसताना त्यांनी ही आत्महत्या केल्याचं उघड झाले आहे. पोलीस ठाण्यात या प्रकरणी नोंद करण्याची प्रक्रिया उशिरापर्यंत सुरू होती.

दरम्यान, राज्यात मनोज जरांगे पाटील यांनी एकीकडे आरक्षणासाठी लढा उभारलेला असताना मराठा बांधव आत्महत्या करताना दिसत आहेत. काही दिवसांपूर्वीच बीडमध्येही मराठा आरक्षणासाठी एका तरुणाने आत्महत्या केल्याची घटना समोर आली होती. त्यानंतर आता छत्रपती संभाजीनगरमध्ये घडलेल्या या घटनेने सर्वत्र हळहळ व्यक्त होत आहे.