Midnight Shootout: ... तर त्याच्या पायावर गोळी मारायची; अमोल खोतकरच्या एन्काऊंटरनंतर बहिणीचे पोलिसांवर गंभीर आरोप

माधव सावरगावे, संभाजीनगर

छत्रपती संभाजीनगरमध्ये दरोड्यातील मुख्य आरोपी अमोल खोतकरचा एन्काऊंटर करण्यात आला होता. या एन्काऊंटरवर अमोलच्या कुटुंबीयांनी आक्षेप घेत पोलिसावर गंभीर आरोप केले आहेत. पोलिसांनी अमोलची हत्या केल्याचा असा आरोप त्याचे वडील बाबुराव खोतकर यांनी केलाय. तर 'माझ्या भावाचा खून होणार होता त्याने अगोदरच सांगितलं होतं.', असं अमोल खोतकर याच्या बहिणीने सांगितले. अमोलच्या बहिणींनी पोलिसांवर केलेल्या आरोपामुळे खळबळ उडाली आहे.

अमोलच्या बहिणीने या एन्काऊंटरप्रकरणावर अनेक प्रश्न उपस्थित करत पोलिसांवर आरोप केले आहे. ती म्हणाली की, 'माझ्या भावाला का मारले? एन्काऊंटर का केले? जर तो पळून जात असेल किंवा तो गोळीबार करत असेल त्याच्या पायावर गोळी घातली पाहिजे होती. त्याला गोळ्या मारल्यात. शरीरावर सगळीकडे गोळ्या मारल्याचे दिसून आले. त्याच्या डोळ्यातून रक्त आले आहे.' तसचं, 'माझा भाऊ अगोदरपासूनच सांगत होता की माझा खून होईल, कोणीतरी मोठा माणूस माझी सुपारी देईल. आता आम्हाला न्याय द्या. मी इथून उठणार नाही.', असा आक्रमक पवित्रा अमोलच्या बहिणीने घेतला आहे.

तर, 'पोलिसांनी दोन ते तीन करोड रुपये घेतले. पोलिसांनी अमोलचा खून केला आहे. व्हिडिओ शूटिंगमध्ये पोस्ट मोर्टम झाले पाहिजे. किती गोळ्या लागल्या ते कळाले पाहिजे.', अशी मागणी अमोलच्या वडिलांनी केली आहे. अमोलची बहीण आणि वडिलांना संभाजीनगर पोलिसांवर उपस्थित केलेल्या प्रश्नांमुळे आणि आरोपांमुळे या प्रकरणात नवा ट्विस्ट येण्याची शक्यता आहे.

दोन आठवड्यांपूर्वी संभाजीनगर शहरातील वाळूज परिसरामध्ये उद्योजक लड्डा यांच्या घरावर मोठा दरोडा टाकण्यात आला होता. या दरोड्यात साडेसहा किलो सोनं-चांदी आणि रोख रक्कम लुटण्यात आली होती. या प्रकरणातला मुख्य आरोपी अमोल खोतकरला पोलिसांनी अटक केली होती. त्याचे पोलिसांनी एन्काऊंटर केले. खोतकरने सोमवारी मध्यरात्री पोलिसांच्या अंगावर गाडी घालून गोळीबार केला. यावेळी संरक्षणार्थ पोलिसांनी त्याचा एन्काऊंटर केला. सध्या अमोल खोतकर याचा मृतदेह घाटी रुग्णालयामध्ये पोस्टमार्टमसाठी पाठवण्यात आला आहे. पोस्टमार्टम केल्यानंतर त्याचा मृतदेह कुटुंबियांना दिला जाणार आहे.