'बदला घेतल्याशिवाय राहणार नाही'; रिलस्टार भैय्या गायकवाडचा VIDEO व्हायरल, मारहाण करणाऱ्यांना थेट धमकी

'हॅलो, मी भैय्या गायकवाड, किंगमेकर ग्रुपचा अध्यक्ष.. काम होतंय की नाही?',असं व्हिडिओतून दमबाजी करणाऱ्या रिलस्टार भैय्या गायकवाडचा आणखी एक व्हिडिओ सोशल मीडियात व्हायरल होत आहे. वादातून टोल कर्मचाऱ्यांनी भैय्या गायकवाडला मारहाण केल्याचं समोर आल. मात्र, आता त्याचा आणखी एक व्हिडिओ व्हायरल होत आहे. मारहाणीनंतर भैय्या गायकवाडने व्हिडिओतून उघड धमकी दिली आहे.

घटनेच्या दिवशी भैय्या गायकवाड कारनं छत्रपती संभाजीनगरला जात होता. त्याच्यासोबत गायकवाडचे काही मित्रही होते. त्याची कार सावंगी समृद्धी टोलनाक्यावर पोहोचली. यावेळी कारला फास्ट टॅग नसल्यामुळे टोल कर्मचाऱ्यांनी गायकवाडला पैसे मागितले. यावेळी भैय्या गायकवाड कारमधून खाली उतरला. त्यानं नेहमीच्या स्टाईलमध्ये टोल कर्मचाऱ्यांशी संवाद साधला.

नंतर त्यांना पगारावरून डिवचले. तसेच टोलचे पैसे देण्यास टाळाटाळ केली. यामुळे टोल कर्मचारी संतापले आणि भैय्या गायकवाडला मारहाण केली. या मारहाणीचा व्हिडिओही सोशल मीडियात व्हायरल झाला. मारहाणीनंतर भैय्या गायकवाडने व्हिडिओ शूट केला. तसेच समाजमाध्यमांमध्ये शेअर केला.

भैय्या गायकवाडने रिलमधून मारेकऱ्यांना उघड धमकी दिली. तसेच अपशब्दांचाही वापर केला. भैय्या गायकवाडने आपल्या स्टाईलमध्ये रिल तयार करून टोल कर्मचाऱ्यांना चॅलेंज दिलं, 'तुम्ही आम्हाला जेवढं मारलंय ना.. याचा बदला नक्कीच घेतल्याशिवाय राहणार नाही.. तुम्ही लोक फक्त इकडे या..ही फक्त जाहिरात.. पिक्चर अभी बाकी है...' अशी थेट धमकी गायकवाडनं व्हिडिओतून दिली आहे.