शिंदेसेनेचा नेता पोलिसांच्या रडारवर, घरावर टाकला छापा; मुख्यमंत्र्यांच्या दौऱ्यापूर्वीच कारवाई

मुख्यमंत्री देवेंद्र फडणवीस यांच्या नाशिक दौऱ्याआधी पोलीस अॅक्शन मोडमध्ये आले असल्याचं पाहायला मिळत आहे. राजकीय गुडांच्या मुसक्या आवळण्यास पोलिसांनी सुरूवात केली आहे. नुकतेच भाजपमध्ये प्रवेश करणारे मामा राजवाडे यांना पोलिसांनी ताब्यात घेतलं आहे. तसेच शिवसेना शिंदे गटातील कुख्यात गुंड पवन पवार देखील नाशिक पोलिसांच्या रडारवर असल्याची माहिती आहे.

पवन पवार आणि विशाल पवार सध्या फरार आहेत. पवन पवार सध्या पोलिसांच्या रडारवर असल्याची माहिती आहे. पोलिसांनी पवन पवार यांच्या घरावर छापा टाकला. पवन पवार याच्यावर खून, खूनाचा प्रयत्न, खंडणीसारखे गुन्हे दाखल आहेत. यासह होर्डिंगप्रकरणीही दोघांवर गुन्हा दाखल असल्याची माहिती आहे. नाशिकरोड पोलिस ठाणे हद्दीत पवन आणि विशाल पवार दोघांवर पोलीस ठाण्यात गुन्हा दाखल आहे.

पवन पवार आणि विशाल पवार यांना ताब्यात घेण्यासाठी त्यांच्या कार्यालयावर आणि घरावर पोलिसांनी आज छापा टाकला. उत्सव काळात परिसरात दहशत निर्माण व्हावी यासाठी त्यांनी परिसरात बॅनरबाजी केली होती. त्याअनुषंगाने नाशिकरोड पोलिस ठाण्यात फौजदारी क्रिमिनल अमेनमेंट ऍक्ट अंतर्गत गुन्हा दाखल करण्यात आला होता.

जेलरोड परिसरात विनापरवानगी स्वागत कमानी आणि डिजिटल होर्डिंग उभारून वाहतुकीस अडथळा निर्माण करणे, तसेच सर्व सामान्यांमध्ये भीती आणि दहशतीचे वातावरण निर्माण होईल, असे कृत्य केल्याप्रकरणी पवन पवार यांच्यासह चौघांविरुद्ध गुन्हा दाखल करण्यात आला होता. सध्या पोलिसांकडून अधिक तपास सुरू आहे.