नर्सेस बनल्या चिमुकल्यांसाठी 'देवदूत', रुग्णालयातील भीषण आगीतून 9 बालकं बचावली

राज्यातील रुग्णालयांमधील आगीच्या घटनांमध्ये वाढ होत चाललीये. अमरावतीमधील शासकीय रुग्णालयातील आगीत 3 नवजात बालकांचा मृत्यू झाला होता. या घटनेची भळभळती जखम शांत होत असतानाच छत्रपती संभाजीनगरमध्ये मोठा अनर्थ टळलाय. एशियन हॉस्पिटलच्या लहान मुलांच्या अतिदक्षता विभागात म्हणजेच NICUमध्ये आग लागल्यानं एकच खळबळ उडाली. यावेळी NICU मधील 9 चिमुकल्यांसह सर्व 58 रुग्णांना नर्सेसनी सुखरुप बाहेर काढून दुसऱ्या हॉस्पिटलमध्ये हलवलंय. या सर्व थरार घटनेचा सीसीटीव्ही व्हिडिओ साम टीव्हीच्या हाती लागलाय... घटनेनंतर कर्मचाऱ्यांची कशी धावपळ झालीये ते पाहा...

मात्र हा अनर्थ टळला तो हॉस्पिटलमधील नर्सेसमुळे. या नर्सेस देवदूत बनून मदतीसाठी धावून आल्यात. हॉस्पिटलमधील आगीच्या घटनेचा अंगावर शहारे आणणारा अनुभव नर्सनं सांगितलाय...

दरम्यान, अग्निशमन दलानं तात्काळ आगीवर नियंत्रण मिळवल्यानं सुदैवानं मोठी दुर्घटना टळलीये. मात्र, एसीतील शॉर्टसर्किटमुळे आग लागल्याची माहिती हॉस्पिटलच्या संचालकांनी दिलीये... खरंतर, अग्निशमन दलाची तत्परता आणि पोलीस, वैद्यकीय कर्मचाऱ्यांची धावपळ या सर्वांमुळे अनेक बालकांसह रुग्णांचेही प्राण वाचलेत. मात्र, यानिमित्तानं हॉस्पिटलमधील सुरक्षा यंत्रणांचा प्रश्न उपस्थित झालाय... एव्हंढच नाही तर हॉस्पिटलमधील सुरक्षा यंत्रणेच्या ऑडिटचा मुद्दाही अधोरेखित झालाय...