Chhatrapati Sambhaji Nagar: रस्त्याच्या कडेने चालणाऱ्या व्यक्तीला कारने चिरडले, घटना CCTV मध्ये कैद

माधव सावरगावे, संभाजीनगर

छत्रपती संभाजीनगरमध्ये (Chhatrapati Sambhaji Nagar) हिट अँड रनची घटना समोर आली आहे. संभाजीनगर शहरातील वाळुज परिसरामध्ये ही घटना घडली आहे. रस्त्याच्या कडेने चालणाऱ्या व्यक्तीला भरधाव कारने चिरडले. या अपघातामध्ये ही व्यक्ती गंभीर जखमी झाली आहे. या व्यक्तीवर रुग्णालयामध्ये उपचार सुरू आहेत. अपघाताची ही घटना सीसीटीव्हीमध्ये (CCTV) कैद झाली आहे. या अपघाताचा तपास वाळुज पोलिसांकडून सुरू आहे.

ठाण्यामध्ये देखील हिट अँड रनची घटना घडली. ठाण्यातल्या वर्तकनगरमधील कोसर भागामध्ये बुधवीरी ही घटना घडली. भरधाव डंपरने दुचाकीला जोरदार धडक दिली. या अपघातामध्ये डंपर अंगावरून गेल्यामुळे ठाणे क्राईम ब्रँचच्या पोलिस कॉन्स्टेबल आणि एका महिलेचा जागीच मृत्यू झाला आहे. सुनील रावते (४४) असे मृत पोलिस कॉन्स्टेबलचे नाव असून ते ठाणे क्राईम ब्रँचमध्ये कार्यरत होते. या अपघाताचा तपास ठाणे पोलिसांकडून सुरू आहे.

तर पुण्यामध्ये हिट अँड रनची घटना घडली. पुण्यातील मार्केट यार्ड परिसरात भीषण अपघात झाला. गंगाधाम चौकात भरधाव ट्रकने महिलेला धडक दिली. या अपघातामध्ये एका महिलेचा जागीच मृत्यू झाला. तर आणखी एक महिला गंभीर जखमी झाली. जखमी महिलेवर रुग्णालयात उपचार सुरू आहेत. या घटनेचा तपास पुणे पोलिसांकडून सुरू आहे.