Thane Hit and Run Case: ठाण्यात भरधाव डंपरने दुचाकीला चिरडले, पोलिस कॉन्स्टेबलसह महिलेचा जागीच मृत्यू

विकास काळे, ठाणे

ठाण्यामध्ये डंपरच्या धडकेमध्ये पोलिस कॉन्स्टेबलचा (Police Constable) मृत्यू झाल्याची धक्कादायक घटना समोर आली आहे. ठाण्यातल्या वर्तकनगरमधील कोसर भागामध्ये ही घटना घडली. भरधाव डंपरने दुचाकीला धडक दिली. या अपघातामध्ये डंपर अंगावरून गेल्यामुळे ठाणे क्राईम ब्रँचच्या पोलिस कॉन्स्टेबल आणि एका महिलेचा मृत्यू झाला आहे. या अपघाताचा तपास ठाणे पोलिसांकडून सुरू आहे.

मिळालेल्या माहितीनुसार, ठाण्याच्या वर्तकनगरमधील कोसर भागात बुधवारी सकाळी भीषण अपघाताची घटना घडली. भरधाव डंपरने दुचाकीला जोरदार धडक दिली. या अपघातानंतर दुचाकीवरील दोघेही जण खाली पडले. डंपरने चिरडल्यामुळे दोघांचाही मृत्यू झाला. या अपघातामध्ये मृत्यू झालेल्यांमध्ये पोलिस कॉन्स्टेबलचा आणि एका महिलेचा समावेश आहे. सुनील रावते (४४) असे मृत पोलिस कॉन्स्टेबलचे नाव असून ते ठाणे क्राईम ब्रँचमध्ये कार्यरत होते.

सुनील रावते यांच्यासोबत दुचाकीवरून जाणाऱ्या महिलेचा देखील अपघातामध्ये दुर्दैवी मृत्यू झाला आहे. ठाण्याच्या वर्तकनगर भागात सुनील रावते हे राहत होते. ते ठाणे गुन्हे अन्वेषण शाखेच्या वागळे युनीटमध्ये कार्यरत होते. बुधवारी सकाळी ते एका महिलेच्या दुचाकीवरून खासगी कामासाठी जात होते. त्याचवेळी डंपरच्या चाकाखाली आल्याने सुनील रावते आणि त्यांच्यासोबत असलेल्या महिलेचा मृत्यू झाला.

हा अपघात नेमका कसा झाला आहे हे अद्याप कळू शकले नाही. अपघाताची नोंद वर्तकनगर पोलिस ठाण्यात करण्यात आली आहे. दोघांचेही मृतदेह शवविच्छेदनासाठी जिल्हा शासकीय रुग्णालयात पाठवण्यात आले आहेत. सुनील रावते यांच्या पश्चात त्यांची पत्नी आणि मुले असा परिवार आहे. त्यांच्या मृत्यूमुळे कुटुंबाला मोठा धक्का बसला असून ते राहतात त्या परिसरात हळहळ व्यक्त केली जात आहे.