Chandrapur News : अपक्ष आमदार किशोर जोरगेवार भाजपमध्ये दाखल; उमेदवारीही निश्चित

चंद्रपूर : चंद्रपूरचे अपक्ष आमदार किशोर जोरगेवार यांनी आज भाजपमध्ये अधिकृत प्रवेश घेतला. भाजपचे ज्येष्ठ नेते सुधीर मुनगंटीवार यांच्या उपस्थितीत हा प्रवेश पार पडला. त्यामुळे आता जोरगेवार यांना चंद्रपुरातून भाजपची उमेदवारी निश्चित झाल्याचे मानले जात आहे. 

मागील काही दिवसांपासून आमदार किशोर जोरगेवार हे प्रमुख राजकीय पक्षांच्या उमेदवारीसाठी प्रयत्न करीत होते. या अनुषंगाने ते शरद पवार यांच्या भेटीला देखील गेले होते. पण तेथे त्यांना प्रतिसाद न मिळाल्याने त्यांनी (BJP) भाजपची वाट धरली. यात भाजप नेते आणि माजी केंद्रीय मंत्री हंसराज अहिर यांनी त्यांना भक्कम पाठबळ दिले. त्यामुळे (Sudhir Mungantiwar) मुनगंटीवार यांची इच्छा नसतानाही जोरगेवार यांना पक्षात प्रवेश देण्याचे आदेश पक्षाने दिले आणि त्या आदेशावर मुनगंटीवार यांनी आज अंमल केला. 

मुनगंटीवार समर्थकांमध्ये असंतोष 

मुनगंटीवार यांनी जोरगेवार यांच्या नावाला मोठा विरोध केला. पण पक्षाच्या निर्णयामुळे त्यांना माघार घ्यावी लागली. यामुळे मुनगंटीवार समर्थकांमध्ये मोठा असंतोष पसरला आहे. असे असले तरी (Chandrapur) चंद्रपूर विधानसभा मतदारसंघातून जोरगेवार यांना भाजपची उमेदवारी निश्चित मानली जात आहे.