Chandrapur News: आईच्‍या डोळ्यादेखत चार वर्षीय मुलगा बिबट्याच्‍या जबड्यात; अंगणातून नेले उचलून

चंद्रपूर : अंगणात बसलेल्‍या एका चार वर्षीय बालकाला बिबट्याने उचलून नेत ठार केले. आईच्या डोळ्यादेखत ही घटना घडली. बिबट्या (Leopard) मुलाला नेत असल्‍याचे पाहून आईने हंबरडा फोडला. यावेळी आजूबाजूचे नागरीक (Chandrapur) गोळा झाले. परंतु, मुलाला वाचविता आले नाही. (Latest Marathi News)

चंद्रपूर जिल्ह्यात पुन्हा मानव- वन्यजीव संघर्ष सुरू झाल्याचे या घटनेने सिद्ध केले. उन्हाळा सुरू होताच वन्यजीव गावाकडे येऊ लागल्याने हा संघर्ष येत्या दिवसांत पुन्हा तीव्र होण्याची शक्यता व्यक्त होत आहे. दरम्‍यान घरासमोरील अंगणात शौचास बसलेल्या मुलाला बिबट्याने आईच्या डोळ्यासमोर उचलून नेले. सावली तालुक्यातील बोरमाळा येथे काल बुधवारी संध्याकाळी ही घटना घडली. हर्षद कारमेंगे असे हल्ल्यात मृत्यूमुखी पडलेल्या मुलाचे नाव आहे.

घरापासून काही अंतरावर सापडला मृतदेह

आज सकाळी घरापासून एक किलोमीटर अंतरावर एका शेतात त्याचा मृतदेह सापडला. या घटनेची माहिती मिळताच वन विभागाचे पथक घटनास्थळी दाखल झाले. अंगणातून बिबट्याने मुलाला उचलून नेल्याने गावात भीतीचे वातावरण पसरले आहे.