Kalamba Central Jail : कळंबा कारागृहात 'या' ठिकाणी सापडले माेबाईल; कोल्हापुरातील एसटी स्टँडवर पाेलिसांचं कोंबिंग ऑपरेशन

- रणजीत माजगावकर

Kolhapur Kalamba Jail News : कोल्हापूर शहरातील कळंबा कारागृहाची सुरक्षा दिवसेंदिवस ढिली पडत चाललेली आहे की काय असा प्रश्न निर्माण झालेला आहे. या कारागृहामध्ये वारंवार मोबाईल सापडण्याच्या घटना समोर येत आहेत. (Maharashtra News)

कोल्हापूरच्या (kolhapur) कळंबा मध्यवर्ती कारागृहाची झाडाझडती घेत असताना 2 मोबाईल हॅन्डसेट आढळलेले आहेत. याप्रकरणी कारागृह शिपाई प्रमोद सरगर यांनी जुना राजवाडा पोलीस ठाण्यात फिर्याद दिली आहे.

सर्कल क्रमांक पाच मधील बराक क्रमांक चारच्या पाठीमागील परिसरात आणि बराक क्रमांक तीनच्या शौचालयाच्या खिडकीमध्ये हे मोबाईल हँडसेट मिळाले आहेत. हे दोन्ही मोबाईल दुधाच्या रिकाम्या पिशवीमध्ये गुंडाळून बॅटरी चिकटटेपने चिटकवलेल्या स्थितीत आढळले आहेत. कारागृह (jail) कर्मचाऱ्यांनी ही बाब वरिष्ठांना सांगितल्यानंतर जूना राजवाडा पोलीस ठाण्यात फिर्याद दाखल करण्यात आली आहे.

मध्यवर्ती बस स्थानक परिसरात पोलिसांचे कोंबिंग ऑपरेशन

कोल्हापूरचे मध्यवर्ती बस स्थानक हे गुन्हेगारीचा अड्डा बनत चाललाय. दररोज या ठिकाणी दुचाकी चोरी, मोबाईल चोरी, पाकीट चोरीसह चेन चोरीच्या अशा घटनांनी चोरट्यांनी पोलिसांना हैराण करून सोडलेय.

या घटनेच्या पार्श्वभूमीवर शाहूपुरी पोलिसांनी ज्यादाची कुमक बोलावून कोल्हापूरच्या मध्यवर्ती बस स्थानकात कोंबिंग ऑपरेशन राबवले. या कोंबिंग ऑपरेशनमध्ये पोलिसांनी संशयास्पद फिरणाऱ्या व्यक्तींवर कारवाईचा बडगा उगारलाय. तसेच प्रवाशांना दक्ष राहण्याच्या सूचना दिल्या आहेत. या कोंबिंग ऑपरेशनमध्ये संशयास्पद प्रवास करणाऱ्या 50 पेक्षा अधिक व्यक्तींना पोलिसांनी तपासून त्याची कसून चौकशीही केलीय.

Edited By : Siddharth Latkar