Nashik : सीबीआयची नाशिकमध्ये मोठी कारवाई, १५ अधिकाऱ्यांविरुद्ध गुन्हा दाखल

CBI FIR against army officials : सीबीआयने नाशिक येथील लष्करी विभागातील भ्रष्टाचाराचा मोठा पर्दाफाश केला आहे. नाशिकच्या तोफखाना केंद्र आणि आर्मी एव्हिएशन सेंटरमधील १५ अधिकाऱ्यांविरुद्ध सीबीआयने ११ भ्रष्टाचाराचे गुन्हे दाखल केले आहेत. लेखापरीक्षक, सहाय्यक लेखाधिकारी आणि लिपिकांवर लष्करी कर्मचाऱ्यांकडून लाच घेऊन आर्थिक फायदा मिळवल्याचा गंभीर आरोप आहे.

मिळालेल्या माहितीनुसार, या अधिकाऱ्यांनी वेतन आणि भत्ते वेळेवर देण्यासाठी लष्करी कर्मचाऱ्यांकडून पैसे उकळले. १३ नोव्हेंबर २०२४ रोजी सीबीआय आणि पुण्याच्या संरक्षण लेखा नियंत्रकांनी संयुक्तपणे अचानक छापा टाकला. या कारवाईत व्हॉट्सअ‍ॅप चॅट्स, लाच मागणीचे संदेश आणि बँक व्यवहारांचे पुरावे हाती लागले. अधिकाऱ्यांच्या मोबाईलमधून लाचखोरीचे संवाद आणि आर्थिक व्यवहारांचे स्पष्ट पुरावे मिळाले. याशिवाय, लाचखोरीसाठी वापरलेली बँक खाती आणि त्यातील व्यवहारांची माहितीही सीबीआयने तपासात उघड केली.

या प्रकरणात सरकारी पदाचा गैरवापर करून बेकायदेशीर आर्थिक लाभ घेतल्याचा ठपका ठेवण्यात आला आहे. भ्रष्टाचार प्रतिबंधक कायदा आणि भारतीय न्याय संहितेच्या विविध कलमांखाली हे गुन्हे दाखल झाले आहेत. सीबीआयने मुंबई, नाशिक, लखनऊ, अहमदाबाद आणि नागपूर येथेही या अधिकाऱ्यांच्या घरी छापे टाकले. या कारवाईने संरक्षण यंत्रणेतील भ्रष्टाचाराचा गंभीर मुद्दा पुन्हा एकदा समोर आला आहे. सीबीआयचा तपास सुरू असून, याप्रकरणी आणखी खुलासे होण्याची शक्यता आहे.