Ravikant Tupkar Rally : वाजत, गाजत, नाचत...उमेदवारी अर्ज दाखल करण्यापूर्वी रविकांत तुपकरांची मिरवणूक

Buldana :

शेतकरी नेते रविकांत तुपकर लोकसभा निवडणुकीच्या रिंगणात उतरले आहेत. बुलढाणा लोकसभा मतदारसंघातून ते अर्ज दाखल करत आहेत. अर्ज दाखल करण्यापूर्वी तुपकारांनी ढोल-ताशाच्या तालावर ठेका धरलाय. तसेच वाजत-गाजत त्यांची मिरवणूक देखील काढण्यात आली आहे.

रविकांत तुपकर हे आपला नामांकन अर्ज दाखल करण्यासाठी जिल्हाधिकारी कार्यालाकडे निघाले आहेत. येथे जाण्याआधी त्यांचे औक्षण करण्यात आले. त्यानंतर डफल्यांचा नाद धुमू लागला. तसेच रविकांत तुपकरांची मिरवणूक काढण्यात आली. या आनंदात कार्यकत्यांसह रविकांत तुपकर देखील थिरकले आहेत.

रविकांत तुपकर यांचा आज बुलढाण्यात निर्धार मेळावा सुरू होता. सभास्थळी पोहचल्यावर तुपकरांनी उपस्थितांशी संवाद साधला. या निर्धार मेळाव्याला शेतकरी आणि नागरिकांची मोठी गर्दी जमली होती. मेळाव्यात भाषण तसेच डफलीच्या तालावर आनंद व्यक्त केल्यानंतर तुपकर उमेदवारी अर्ज दाखल करण्यासाठी बैलगाडीने जिल्हाधिकारी कार्यालयाकडे निघालेत.

मी अपक्ष नाही तर वंचित , बहुजन, भूमिहीन, शेतकरी यांचा उमेदवार आहे. आज मी अर्ज दाखल करणार आहे यासाठी जिल्हाभरातून हजारो शेतकरी बांधव स्वयंफूर्तीने उपस्थित राहणार आहेत, असं शेतकरी नेते रविकांत तुपकर यांनी उपस्थितांना संबोधित करताना म्हटलंय.

विरोधकांवर निशाणा साधत त्यांनी पुढे म्हटलं, फक्त पैशाच्या भरवशावर निवडणुका जिंकता येत नाहीत. भानगड अशी झाली की, माझ्या उमेदवारीमुळे यांच्या पायाखालची वाळू सरकली आहे. आता ही निवडणूक जनतेची आहे आणी जनता माझाच विचार करणार असून माझा विजय निश्चित आहे, असा विश्वास रविकांत तुपकर यांनी व्यक्त केलाय.