Buldhana News: औषध फवारणी करताना काळजी घ्या! बुलढाण्यात आणखी चार महिलांना विषबाधा; रुग्णालयात उपचार सुरु

संजय जाधव, बुलढाणा|ता. २० जुलै २०२४

बुलढाणा जिल्ह्यातील धामणगाव बडे येथे शेतामध्ये किटकनाशके फवारताना विषबाधा झाल्याची घटना घडली होती. यामध्ये एका शेतकऱ्याचा जागीच मृत्यू झाला होता. त्यानंतर आता आणखी चार महिलांना विषबाधा झाली असून उपचारासाठी रुग्णालयात दाखल करण्यात आले आहे.

याबाबत सविस्तर माहिती अशी की, बुलढाणा जिल्ह्याच्या धामणगाव बढे येथे एका शेतात मका पिकासाठी वापरल्या जाणाऱ्या फ्यूरी नामक कीटकनाशकापासून ८ जणांना विषबाधा झाल्याची घटना घडली होती. ज्यामध्ये एका शेतकऱ्याचा मृत्यू झाला होता, तर तीन जणांची प्रकृती अत्यावस्थ होती.

आता पुन्हा त्याच परिसरातील सिंदखेड लपाली येथील चार महिलांना विषबाधा झाली आहे, ज्यामध्ये एका १७ वर्षाच्या मुलीचाही समावेश आहे. या सर्व महिलांवर बुलढाणा जिल्हा सामान्य रुग्णालयात उपचार सुरू आहेत. सध्या त्यांची प्रकृती स्थिर असल्याचे सांगण्यात येत आहे.

दरम्यान, काल दामोदर नारायण जाधव (वय,६०) आणि त्यांच्या परिवारातील सदस्य शेतात औषध मारत होते. यावेळी अचानक सर्वांना मळमळ उलट्या होऊ लागल्या. त्यांना तात्काळ रुग्णालयात दाखल करण्यात आले. मात्र डॉक्टरांनी त्यांना मृत घोषित केले.