Buldhana News: अरेरे! रुग्णालयात विडी पेटवली, स्वतःलाही पेटवून घेतलं; रुग्णालयात तरुणाचा होरपळून मृत्यू

बुलडाण्यामध्ये एका तरुणाने रुग्णालयामध्ये स्वत:ला पेटवून घेतल्याचा धक्कादायक प्रकार घडला आहे. लोणार येथील ग्रामीण रुग्णालयात ही धक्कादायक घटना घडली आहे. या घटनेमध्ये तरुणाचा जागीच मृत्यू झाला. रुग्णालयामध्येच हा प्रकार घडल्यामुळे एकच खळबळ उडाली. हा तरुण मनोरुग्ण असल्याची माहिती समोर आली आहे.

लोणार येथील ग्रामीण रुग्णालायत एका मनोरुग्णाने स्वतःला पेटवून घेतं. रविवारी रात्रीच्या सुमारास ही घटना घडली. यामध्ये या तरुणाचा जागीच मृत्यू झाला. या तरुणाला रात्रीच ग्रामीण रुग्णालयामध्ये उपचारासाठी दाखल करण्यात आले होते. या तरुणाने विडी पिण्यासाठी माचीसची काडी पेटवली आणि स्वत:ला आग लावून घेतली. या आगीमध्ये हा तरुण गंभीर जखमी झाला आणि यामध्ये त्याचा मृत्यू झाला.

सुदैवाने ही घटना घडली त्यावेळी ग्रामीण रुग्णालयामध्ये कोणताही रुग्ण नव्हता. या धक्कादायक घटनेनंतर आता प्रश्न उपस्थित होत आहे की डॉक्टर कुठे होते? तसेच रुग्णाल्यातील नर्स कुठे होत्या? या घटनेने रुग्णसेवा व्यवस्थेवर प्रश्नचिन्ह उपस्थित केले जात आहे. विशेष म्हणजे लोणार हा तालुका केंद्रीय मंत्री प्रतापरावं जाधव यांच्या मतदारसंघामध्ये येतो.