Accident: देवदर्शनाला जाताना काळाचा घाला, पिकअप उलटून दोघांचा जागीच मृत्यू; २३ जण गंभीर जखमी

बुलडाण्यात भीषण अपघात झाला. देवदर्शनासाठी निघालेल्या भाविकांवर काळाने घाला घातला. सैलानी बाबांच्या दर्शनासाठी निघालेल्या पिकअपने जाणाऱ्या बागवान कुटुंबावर काळाने झडप घातली. या अपघातामध्ये दोघांचा मृत्यू झाला तर २३ जण गंभीर जखमी झाले. मेहकरजवळ नांद्रा फाट्यावर ही घटना घडली. चालकाला डुलकी लागल्याने हा अपघात झाल्याचा संशय व्यक्त केला जात आहे.

मिळालेल्या माहितीनुसार, मेहकर तालुक्यातील नांद्रा फाटा येथे आज सकाळी हा भीषण अपघात झाला. लातूर जिल्ह्यातील अहमदपूर येथे राहणारे बागवान कुटुंबीय बुलडाणा जिल्ह्यातल्या सैलानी बाबांच्या दर्शनासाठी जात होते. हे सर्वजण पिकअपने निघाले होते पण सैलानी बाबांच्या दर्शनापूर्वीच भयंकर घटना घडली. नांद्रा फाटा येथे पिकअप उलटला. या अपघातामध्ये ३० जण गंभीर जखमी झाले होते. यामधील गंभीर जखमी झालेल्या दोघांनी जागीच प्राण सोडले.

अपघातामध्ये जखमी झालेल्या २३ प्रवाशांवर रुग्णालयात उपचार सुरू आहेत. यामधील अनेकांची प्रकृती गंभीर आहे. या घटनेमुळे परिसरात हळहळ व्यक्त होत असून बागवान कुटुंबावर दुःखाचा डोंगर कोसळला आहे. चालकाचे पिकअपवरील नियंत्रण सुटल्याने वाहन उलटल्याची माहिती प्रत्यक्षदर्शींनी दिली. चालकाला डुलकी लागल्यामुळे हा अपघात झाला असावा अशी शक्यता व्यक्त करण्यात येत आहे.

या अपघातामध्ये अरमान शरीफ बागवान (वय १६ वर्षे) आणि रिहान सैदु बागवान (वय १७ वर्षे) या दोघांचा मृत्यू झाला. हे दोघे लातूरच्या अहमदपूर येथे राहणारे होते. तर इतर प्रवासी गंभीर आणि किरकोळ जखमी झाले असून त्यांच्यावर मेहकर येथील ग्रामीण रुग्णालयात उपचार सुरू आहेत. काही गंभीर जखमींना पुढील उपचारासाठी खासगी रुग्णालयात हलविण्यात आले आहे. या अपघाताचा तपास बुलडाणा पोलिस करत आहेत.