बीडमधील हिंगणी तलावात होडी उलटली; दोन मुलींचा पाण्यात बुडून मृत्यू

बीडमधील धारूर तालुक्यात असलेल्या हिंगणी तलावात होडी उलटल्याची घटना घडली असून यात दोन मुलींचा पाण्यातू बुडून मृत्यू झाला आहे. ही दुर्घटना साडेदहाच्या सुमारास घडली. या मुलींचे कुटुंबीय मासेमारीचा व्यवसाय करतात. हाती आलेल्या माहितीनुसार, मासेमारी व्यवसाय करणाऱ्या कुटुंबातील ५ मुली हिंगणी तलावात पोहण्यासाठी गेल्या होत्या.

हिंगणी येथील पारवे कुटुंबातील पलक शामराव पारवे, दिव्या विकास कांबळे, मोहिनी भीमराव पारवे, तन्वी कोंडीराम पारवे, जानवी कोंडीराम पारवे या मुली हिंगणीचा तलावावर शनिवारी सकाळी पोहण्यास गेल्या होत्या. तिथे असलेल्या मासे पकडण्याच्या होडीवर पलक, दिव्या व मोहिनी या तिघीजण बसल्या.

होडी तलावाच्या आत गेल्यावर होडी अचानक उलटली त्यात तिघीही पाण्यात बुडाल्या. यात मोहिनीला पोहता येत होते. पलक व दिव्या या दोघींनी तिला पकडल्याने तीही पाण्यात बुडाली. तळ्याच्या काठावर असलेल्या मुलींनी आरडाओरडा केल्याने स्थानिकांनी घटनास्थळावर धाव घेत तिघींना बेशुद्ध अवस्थेत पाण्यातून बाहेर काढले.

यात मोहिनीला शुद्ध आली असून पलक शामराव पारवे (वय 14, रा.हिंगणी) दिव्या विकास कांबळे रा. कासारवाडी ता.परळी) यांना अंबाजोगाई येथील रुग्णालयात दाखल करण्यात आले. मात्र डॉक्टरांनी त्यांना मृत घोषित केले. या घटनेनंतर हिंगणी गावात शोककळा पसरली.

टेंभापुरी धरणात तिघांचा बुडून मृत्यू

वाळूज जवळील टेंभापुरी मध्यम प्रकल्प परिसरात अवैध मुरूम उत्खननामुळे तयार झालेल्या खड्ड्यात साचलेल्या पाण्यात बुडून ३ तरुणांचा मृत्यू झाला. ही घटना कामगार दिनाच्या सुटीदिवशी घडली होती. १ मे रोजी दुपारी अडीच वाजेच्या ही दुर्घटना घडली. या धरणात आणि परिसरातील खड्ड्यांत बुडून वर्षभरात तब्बल नऊ जणांचा बळी गेला असून, प्रशासनाच्या सुस्त कारभारावर आता तीव्र संताप व्यक्त होत आहे.