ऐन निवडणुकीच्या महासंग्रामात भाजपनं उचललं मोठं पाऊल, पक्षातील 22 बड्या पदाधिकाऱ्यांची हकालपट्टी

छत्रपती संभाजीनगर शहरात भाजपने पक्षशिस्त मोडणाऱ्या कार्यकर्ते आणि पदाधिकाऱ्यांविरोधात मोठी कारवाई केली आहे. पक्षविरोधी भूमिका घेतल्याने आणि शिस्तभंग केल्याच्या कारणावरून भाजपने तब्बल 22 जणांना पक्षातून काढून टाकले आहे. महापालिका निवडणुकीत काही पदाधिकाऱ्यांनी आणि कार्यकर्त्यांनी बंडखोरी करत दुसऱ्या पक्षातून उमेदवारी स्वीकारली, तर काहींनी अपक्ष म्हणून अर्ज दाखल केला. यासोबतच पक्षाच्या अधिकृत भूमिकेला छेद देणारी वक्तव्ये केल्याचाही ठपका संबंधितांवर ठेवण्यात आला आहे.

भाजपच्या नियमांचे आणि शिस्तीचे पालन न करणाऱ्यांवर कारवाई करण्याचा इशारा यापूर्वीच देण्यात आला होता. त्यानुसार बंडखोरी करणारे, अपक्ष उमेदवारी अर्ज दाखल करणारे तसेच पक्षशिस्त भंग करणाऱ्या कार्यकर्ते व पदाधिकाऱ्यांवर ही कारवाई करण्यात आली आहे.

पक्षशिस्त आणि संघटनात्मक मजबुती राखण्यासाठी अशा कारवाया आवश्यक असल्याचे भाजपकडून स्पष्ट करण्यात आले असून, भविष्यातही पक्षविरोधी कारवायांना माफी दिली जाणार नाही, असा इशाराही जिल्हाध्यक्ष किशोर शितोळेकडून देण्यात आला आहे.

यावेळी किशोर शितोळे म्हणाले, शंभर ते सव्वाशे लोकांनी अर्ज भरला होता. त्यानंतर आमच्या वरिष्ठ लोकांनी त्यांची भेट घेऊन त्यांची भावना समजून घेण्याचा प्रयत्न केला आणि त्यांना समजावून सांगितल्यानंतर सर्व उमेदवारांनी अर्ज मागे घेतला. पण यामधील 22 जणांनी अर्ज मागे न घेता उमेदवारी इतर पक्षांकडून घेतली असून बाहेर असा दाखवण्याचा प्रयत्न करत आहे की आम्हाला पक्षाने उमेदवारी दिली आहे. यामुळे आम्हाला या सर्वांवर कारवाई करणे क्रमप्राप्त होते. त्यामुळे आम्ही त्यांचे निलंबन केले असून आता त्यांचा आणि पक्षाचा कुठलाही संबंध नाही.

पुढे ते म्हणाले, आम्ही काल परवा पर्यंत खूप प्रयत्न केले आणि की समजून घ्या आपला पक्ष खूप मोठा आहे. भारतीय जनता पक्षांसारखे भविष्य समाजाला पाहिजे असलेल्या पक्षामध्ये तुमचे भविष्य आहे. मनपाच्या निवडणुकीत जरी तुम्हाला संधी मिळाली नसेल तरी आणखी खूप संधी आहे. आपण संयम राखला पाहिजे. असे सांगून देखील त्यांनी पक्षविरोधी काम केल्याने त्यांच्यावर कारवाई करण्यात आल्याचे किशोर शितोळे यांनी सांगितले.