Dharashiv Bird Flu: ढोकीत बर्ड फ्ल्यूचा प्रादुर्भाव; कोंबड्यांनाही लागण

धाराशिव जिल्ह्यातील ढोकी गावात बर्ड फ्ल्यूचा प्रादुर्भाव दिसून आला आहे. फेब्रुवारीच्या शेवटच्या आठवड्यात, या परिसरात २७ कावळे मृतावस्थेत आढळले होते. त्यांच्या नमुन्यांची तपासणी केल्यानंतर, बर्ड फ्ल्यू (H5N1) विषाणूची लागण झाल्याचे निष्पन्न झाले.

त्यानंतर, आता या परिसरात कोंबड्यांनाही बर्ड फ्ल्यू झाल्याचे समोर आले आहे. भोपाळ येथील प्रयागशाळेत तपासणीसाठी पाठवण्यात आलेल्या कोंबड्यांच्या नमुन्यांचे अहवाल पॉझिटिव्ह आले असून, त्यांना बर्ड फ्लू (H5N1) ची लागण झाल्याचे निष्पन्न झाले आहे.

या परिस्थितीत, बर्ड फ्ल्यूचा प्रसार रोखण्यासाठी प्रशासनाने कोंबड्या नष्ट करण्याचे आणि त्यांच्या वाहतुकीवर निर्बंध लावण्याचे आदेश दिले आहेत. शेतकऱ्यांना, कोंबड्या मृत आढळल्यास, त्वरित पशुवैद्यकीय विभाग किंवा ग्रामपंचायतीला सूचित करण्याचे आवाहन करण्यात आले आहे.

कावळ्यांच्या माध्यमातून ढोकीत बर्ड फ्ल्यूचा प्रसार झाल्याचे मानले जात आहे, त्यामुळे दहा किलोमीटरचा परिसर अलर्ट झोन म्हणून घोषित करण्यात आला आहे. दरम्यान, पहिल्या बर्ड फ्ल्यू संशयित रुग्णाचा पुणे येथील प्रयोगशाळेत पाठवलेला नमुना निगेटिव्ह आला आहे, त्यामुळे सध्या मानवी संसर्गाची घटना नाही.

Edited By - Purva Palande