Jayant Patil : राष्ट्रवादी काँग्रेसमध्ये खांदेपालट, जयंत पाटील यांनी प्रदेशाध्यक्षपद सोडलं? या नेत्याचे नाव चर्चेत

महाराष्ट्राच्या राजकारणातून मोठी बातमी समोर आली आहे. राष्ट्रवादी काँग्रेस शरद पवार गटाचे नेते जयंत पाटील यांनी प्रदेशाध्यक्षपदाचा राजीनामा दिल्याची माहिती सुत्रांनी दिली आहे. आमदार शशिकांत शिंदे हे राष्ट्रवादी काँग्रेस शरद पवार गटाचे नवे प्रदेशाध्यक्ष होणार असल्याचे म्हटले जात आहे. शशिकांत शिंदे यांची राष्ट्रवादी काँग्रेस शरदचंद्र पवार पक्षाच्या प्रदेशाध्यपदी निवड करण्यात आली असून येत्या १५ जुलैला म्हणजे मंगळवारी शशिकांत शिंदे हे प्रदेशाध्यक्षपदाचा पदभार स्वीकारणार असल्याचे समोर आले आहे.

जयंत पाटील हे गेल्या अनेक दिवसांपासून मला प्रदेशाध्यक्षपदातून मुक्त करा अशी मागणी करत होते. पुण्यात झालेल्या राष्ट्रवादी काँग्रेसच्या वर्धापददिनाच्या कार्यक्रमात देखील भाषण करताना त्यांनी शरद पवार यांच्यासमोर प्रदेशाध्यक्षपदातून मुक्त करा असे बोलून दाखवले होते. त्यावेळी साहेब जो निर्णय घेतील तो मला मान्य असेल असं देखील जयंत पाटील यांनी सांगितले होते.

'पवारसाहेबांनी मला बरीच संधी दिली. सात वर्षांचा कालवधी दिला. शेवटी पक्षाने नव्या चेहऱ्यांना संधी देणे गरजेचे आहे.', असे म्हणत त्यांनी शरद पवार यांचे आभार देखील मानले होते. जयंत पाटील यांच्यानंतर प्रदेशाध्यक्ष कोण होणार याची चर्चा सुरू होती. अखेर शरद पवार यांनी निर्णय घेतला. जयंत पाटील यांनी आज प्रदेशाध्यक्ष पदाचा राजीनामा दिला असल्याचे सांगितले जात असून या पदासाठी साताऱ्याचे आमदार शशिकांत शिंदे यांना संधी देण्यात आली असल्याचे बोलले जात आहे.

आता राष्ट्रवादीच्या प्रदेशाध्यपदाची धुरा शशिकांत शिंदे सांभाळणार असल्याचे बोलले जात आहे. १५ जुलै रोजी शरद पवारांच्या राष्ट्रवादीची महत्वाची बैठक देखील होणार आहे. याच बैठकीत शशिकांत शिंदे प्रदेशाध्यपद स्वीकारणार आहेत. शशिकांत शिंदे हे विधान परिषदेचे आमदार आणि मुख्य प्रतोद आहेत. १८ फेब्रुवारी २०२४ पासून जयंत पाटील हे राष्ट्रवादी काँग्रेस शरद पवार गटाचे प्रदेशाध्यक्ष होते.