Bhusawal News : विद्यार्थ्यांच्या जीवाशी खेळ! नगरपालिका शाळेत जेवणाच्या साहित्यामध्ये आढळला मृत धनोर किडा

संजय महाजन, साम टीव्ही, प्रतिनिधी

Bhusawal News : भुसावळमधून एक धक्कादायक प्रकार समोर आला आहे. भुसावळ शहरातील नगरपालिका शाळेत जेवणात मृत धनोर किडा सापडला आहे. नगरसेवक महिंद्रा ठाकूर यांनी हा प्रकार उघडकीस आणला. नगरपालिका शाळेच्या जेवणात किडा सापडल्याने पालकांकडून संताप व्यक्त केला जात आहे.

भुसावळ शहरातील नगरपालिका शाळा क्र. ३५ मध्ये शालेय पोषण आहारात सोयाबीन पुलाव बनवून विद्यार्थ्यांना खाण्यासाठी दिला जातो. हा पुलाव बनवण्यासाठी पुरविण्यात आलेल्या सोयाबीनच्या वड्यांमध्ये मृत धनोर किडा आढळला. आहार विद्यार्थ्यांना देण्याआधीच हा प्रकार समोर आल्याने अनर्थ टळला असे लोक म्हणत आहेत.

नगरपालिका शाळेतला हा प्रकार भुसावळ शहरातील नगरसेवक महिंद्रा ठाकूर यांनी उघडकीस आणला. त्यांनी पोषण आहार पुरवठा अधिकारी यांच्यासह भुसावळ नगरपालिकेचे मुख्य अधिकारी यांच्याकडे संबंधित प्रकारावरुन तक्रार नोंदवली आहे. ठाकूर यांनी संबंधितांवर कारवाई करण्याची मागणी देखील केली आहे.

नगरपालिका शाळा क्र. ३५ मध्ये सदर पोषण आहार हा लोकशाही महिला गृह उद्योग संचलित केंद्रीय स्वयंपाक गृहप्रणालीच्या मार्फत पुरवण्यात येतो. तेव्हा तपास करुन दोषींवर कारवाई करण्याची मागणी विद्यार्थी आणि त्यांच्या पालकांकडून होत आहे. जेवणाच्या साहित्यामध्ये किडा सापडल्याने शाळेत खळबळ उडाली आहे.