Bhandara News : अंगावर घराची भिंत कोसळून तरुणाचा मृत्यू; करांडला येथील घटना

शुभम देशमुख 
भंडारा : शेतातून काम करून घरी आलेल्या युवकाचा दुर्दैवी मृत्यू झाला आहे. शेतातून आल्यानंतर थोडा वेळ आराम करून स्वतःच्याच जुन्याजवळ काही काम करण्यासाठी गेला असताना त्या घराची भिंत अचानक कोसळली. या भिंतीखाली दबला गेल्याने तरुणाचा मृत्यू झाल्याची घटना लाखांदूर तालुक्यातील करांड या गावात घडली आहे. 

सदरची घटना भंडारा (Bhandara) जिल्ह्याच्या लाखांदूर तालुक्यातील करांडला येथे घडली आहे. या घटनेत योगेश खुशाल देशमुख (वय ३५) या तरुणाचा भिंतीखाली दबून दुदैवी मृत्यू (Death) झाला आहे. मृतक योगेश देशमुख यांचा शेती हा मुख्य व्यवसाय आहे. शेती काम करूनच कुटुंबाचा उदरनिर्वाह चालवत होता. सध्या पावसाळ्याचे दिवस असल्याने शेतीचे काम सुरु आहे. त्यामुळे घटनेच्या दिवशी योगेश देशमुख हा सकाळी शेतात गेला होता. शेतावरील काम करून घरी परतला. आणि आपल्या जुन्या घराशेजारी काही काम असल्याने तेथे गेला. 

आपल्या जुन्या घराजवळ काम करत होता. दरम्यान, जवळच असलेल्या एका जुन्या घराची मातीची भिंत अचानकपणे कोसळली. त्यामुळे, भिंती शेजारी काम करीत असलेला योगेश हा त्या भिंतीच्या मलब्यात दाबला गेला. त्याला बाहेर काढण्यास उशीर झाल्याने मातीच्या ढिगाऱ्याखाली दबला जाऊन त्याचा मृत्यू झाला.