Bhandara News : पायाभूत सुविधांचा अभाव; ग्रामस्थांचा निवडणुकीवर बहिष्कार, साकोली विधानसभा क्षेत्रातील गट ग्रामपंचायतीने केला ठराव

शुभम देशमुख 

भंडारा : गावांचा विकास झाला नाही, पक्के रस्ते अद्याप झालेले नाहीत. एकिकडे देश अमृत महोत्सव साजरा करतोय व सानगाव येथे जाण्यासाठी अजूनही पक्का रस्ताच नाही. यामुळे आगामी विधानसभा निवडणुकीवर बहिष्कार टाकण्याचा निर्णय ग्रामस्थांनी घेतला आहे. साकोली विधानसभा क्षेत्रातील देवरी, सायगाव, सानगाव या गट ग्रामपंचायतीने ठराव करत सदरचा निर्णय घेतला आहे. 

देशात स्वातंत्र्याचा अमृत महोत्सव साजरा केला आहे. मात्र अजूनही भंडारा (Bhandara) जिल्ह्यातील ग्रामीण भागात पक्के रस्ते नाही. भावी मुख्यमंत्री संबोधल्या जाणाऱ्या कॉग्रेसचे प्रदेश अध्यक्ष नाना पटोले (Nana Patole) यांचा साकोली मतदार संघात विकास मात्र खुंटला असल्याचं चित्र पाहायला मिळत आहे. लाखनी तालुक्यातील गट ग्रामपंचायत असलेली देवरी, सानगाव, सायगाव या जंगल व्याप्त भागात गाव असल्याने नेहमी याकडे दुर्लक्ष केलं जाते. गावात जायला पक्का रस्ता नाही. दुसरीकडे सायगाव येथे तर स्वत्रंत काळापासून जाण्यासाठी पक्का रस्त्याच्या प्रतिक्षेतच आहेत. अनेकदा निवेदन दिले मात्र अजूनही याकडे दुर्लक्षच आहे.  

एक नाही तर गट ग्रामपंचायत असलेल्या तिन्ही गाव विकाच्या मुख्य प्रवाहातून कोसो दूर आहेत. या गावांची परिस्थिती पाहिल्यावर स्वतंत्रपूर्वीची परिस्थीती असल्याचे दिसून येते. याच कच्या रस्त्यानी गर्भवती महिला, शाळकरी मुले प्रवास करीत आहेत. दुसरीकडे एसटी बस देखील गावात पोहचली नाही. पावसाळ्यात तर या रस्त्यांवर जाताना तारेवरची कसरत करावी लागत असते. या सर्वानी त्रस्त ग्रामस्थांनी येणाऱ्या विधानसभा निवडणुकीवर बहिष्कार टाकण्याचा निर्णय ग्रामपंचायत व गावकऱ्यांनी घेतला असून तसा ठराव देखील घेण्यात आला आहे. यामुळे प्रशासन आता यापुढे गावाबाबत काय भूमिका घेणार हे पाहणे महत्वाचे ठरेल.