Buldhana News : लोंबकळलेल्या विद्युत तारेला स्पर्श होऊन जोरदार झटका; शेतात कामासाठी गेलेल्या तरुणाचा मृत्यू

बुलढाणा : लोणार तालुक्यातील मांडवा येथील शेतकरी पुत्र फरान खाॅ सुभान खाॅ पठाण यांचा लोंबकळलेल्या ११ केव्ही तारेचा करंट लागल्याने मृत्यू झाल्याची घटना मांडवा शिवारात घडली. महावितरणच्या भोंगळ कारभारामुळे बाली गेल्याने परिसरातील शेतकऱ्यांमधून संताप व्यक्त केला जात आहे. 

सदरची घटना प्रकाश आसाराम वाघ यांच्या शेतामध्ये घडली आहे. पेरणीचे दिवस जवळ आल्याने (Buldhana) शेतीच्या मशागतीला सुरुवात झाली आहे. फरान खाॅ पठाण यांनी आपल्या शेताच्या शेजारी असलेल्या प्रकाश आसाराम वाघ यांच्या बैलगाडी घेऊन शेतात वखरणी करण्यासाठी गेला होता. बैलगाडी प्रकाश वाघ यांच्या गोठ्याजवळ उभी केली आणि गाडीतून वखर खाली उतरत असताना फरान यांनी वखर खांद्यावर घेतला तेव्हा वखराच्या दांडीचा स्पर्श खाली लोंबकळलेल्या ११ केव्हीच्या तारेचा स्पर्श (Electric Shock) झाला.

एकुलता एक मुलगा गेला 
फरान खाली कोसळल्यावर प्रकाश वाघ यांनी त्याचा चुलत भाऊ सिंकदर खाॅ सरदार खाॅ पठाण यास फोन करून शेतात (Farmer) बोलविले. यानंतर फरानला मोटरसायकलवर बसून बीबी ग्रामीण रुग्णालय येथे आणले असता डॉक्टरांनी फरानला मृत घोषित केले. फरान हा एलएलबीच्या अंतिम वर्षात शिक्षण घेत होता. आई- वडिलांचा एकुलता एक मुलगा होता. त्याच्या पश्चात आई- वडील व तीन बहिणी आहेत.