Cough Syrup : बंदी केलेले कफ सिरप विक्रीला; भंडाऱ्यात तीन औषध विक्रेत्याकडून सिरप जप्त

शुभम देशमुख 
भंडारा : मध्य प्रदेशात उत्पादित करण्यात आलेल्या कफ सिरपमुळे बालकांचा मृत्यू झाल्याचा गंभीर घटना समोर आल्या आहेत. या नंतर महाराष्ट्रातही औषध निर्माण प्रशासन अलर्ट मोडवर आहे. यात काही कफ सिरपवर बंदी घालण्यात आली आहे. असे असताना देखील हे कफ सिरप विक्रीसाठी मेडिकलमध्ये असल्याचे भंडाऱ्यात समोर आले आहे. हा बंदी असलेल्या कफ सिरपचा साठा विक्रेत्यांकडून जप्त करण्यात आला आहे. 

काही दिवसांपूर्वी कफ सिरपमुळे लहान मुलांचा मृत्यू झाल्याच्या घटना मध्यप्रदेशमध्ये घडल्या आहेत. यामुळे आरोग्य यंत्रणा अलर्ट झाली आहे. दरम्यान महाराष्ट्रातही मध्यप्रदेशातून मोठ्या प्रमाणात कप सिरपचा पुरवठा करण्यात आल्याचा अंदाज व्यक्त करण्यात येत आहे. त्या अनुषंगाने भंडारा औषध व अन्न प्रशासन विभागाने भंडाऱ्यातील औषध विक्रेत्या दुकानात तपासणी करण्यात येत आहे. यात काही ठिकाणी बंदी असलेले कफ सिरप आढळून आले. 

डॉक्टरांच्या चिठ्ठी शिवाय विक्री 

विक्रेत्यांकडे करण्यात आलेल्या तपासणीत तीन औषध विक्रेत्यांकडे कप सिरप आढळून आले. तीन दुकानात आढळून आलेला औषध साठा भंडारा अन्न व औषध प्रशासन विभागाने जप्त केला आहे. हे औषध विक्रेते डॉक्टरांच्या चिट्ठी शिवाय कप सिरप विक्री करीत असल्याचे निदर्शनात आल्यामुळे या विक्रेत्यांवर अन्न व औषध प्रशासन कायद्यांतर्गत कारवाई करण्यात येत असल्याची प्रक्रिया सुरू आहे.

डॉक्टरांच्या चिठ्ठीशिवाय कफ सिरप खरेदी न करण्याचे आवाहन 

लहान मुलांना खोकला झाल्यावर कफ सिरपची खरेदी डॉक्टरांच्या चिठ्ठीशिवाय खरेदी करू नये; असे आवाहन सहायक आयुक्त (औषधे) अन्न व औषध प्रशासन , भंडारा यांच्यामार्फत करण्यात आले आहे. मध्यप्रदेश, राजस्थान या राज्यामध्ये खोकल्याच्या औषधाचे सेवनामुळे २१ बालकांचा मृत्यू झाल्याबाबतच्या बातम्या प्रसिद्ध झाल्या आहेत. त्याअनुषंगाने आरोग्य व कुटूंब कल्याण मंत्रालय भारत सरकार यांचे ३ ऑक्टोबर २०२५ व राज्याचे औषध नियंत्रक यांचे ७ ऑक्टोबर २०२५ च्या परिपत्रकानुसार रजिस्टर्ड प्रॅक्ट्रीशनर यांच्या चिठ्ठीवरच औषधांची विक्री करावी अशा सूचना औषध व्यावसायिकांना देण्यात आल्या आहेत.