भंडाऱ्यात विजेचा तांडव! 3 ठिकाणी वीज कोसळून 2 ठार, 2 गंभीर

भंडारा जिल्ह्यात आज विजांच्या कडकडाटासह झालेल्या मुसळधार पावसामुळे तीन ठिकाणी वीज कोसळून मोठी दुर्घटना घडली. या तीन वेगवेगळ्या घटनांमध्ये दोघांचा मृत्यू झाला असून दोन जण गंभीर जखमी झाले आहेत. सध्या खरीप हंगामाच्या तयारीत शेतकरी शेतात काम करत असताना ही दुर्घटना घडल्याने परिसरात भीतीचं वातावरण निर्माण झालं आहे. तुमसर तालुक्यातील चारगाव-ढोरवाडा शेतशिवारात वीज कोसळल्याने शरद बुधे (वय ४५) यांचा मृत्यू झाला. ते आपल्या मेहुण्यासोबत शेतात काम करत होते. या घटनेत महेश फेंडर (वय ३५) हे गंभीर जखमी झाले असून त्यांच्यावर तुमसर येथील उपजिल्हा रुग्णालयात उपचार सुरू आहेत.

तसेच खापा येथे वीज कोसळल्याने तुकडू चौधरी (वय ७०) हे गंभीर जखमी झाले आहेत. त्यांच्यावरही तुमसर उपजिल्हा रुग्णालयात उपचार सुरू आहेत. दरम्यान, तिसरी घटना पवनी तालुक्यातील ब्रम्ही येथे घडली. शेतात काम करत असताना श्रीकांत घावडे (वय ३९) यांच्या अंगावर वीज कोसळल्याने त्यांचा जागीच मृत्यू झाला.

या तिन्ही घटनांमुळे जिल्ह्यात खळबळ उडाली आहे. विशेष म्हणजे, मागील १२ दिवसांत तुमसर तालुक्यात चार वेळा वीज कोसळण्याच्या घटना घडल्या असून यामध्ये एका महिलेचा आणि तब्बल २५ जनावरांचा मृत्यू झाला आहे.