Bhandara News: हृदयद्रावक घटना! पडक्या विहिरीत पडलेल्या कासवाला वाचवायला गेले अन् विपरित घडलं... २ युवकांनी गमावला जीव

शुभम देखमुख, प्रतिनिधी...

Bhandara News: भंडारा जिल्ह्याच्या लाखनी तालुक्यातून एक दुर्देवी घटना समोर आली आहे. विहिरीत पडलेल्या कासवाला वाचवायला गेलेल्या दोन तरुणांना आपला जीव गमवावा लागल्याची घटना उघडकीस आली आहे. मंगेश जय गोपाल गोंधुळे (मेंढा भुगाव) आणि दयाराम सोनीराम भोंडे (मेंढा भुगाव) अशी मृत तरुणांची नावे आहेत. या ह्रदयद्रावक घटनेने परिसरात हळहळ व्यक्त केली जात आहे.

नेमकं काय घडलं?

समोर आलेल्या माहितीनुसार, सध्या पावसाळ्याचे दिवस असल्याने शेती कामांना वेग आलेच तर ग्रामीण भागात धान रोवणीसाठी धुमाकूळ सुरू आहे. अशातच भंडारा जिल्ह्यातून एक दुर्देवी घटना समोर आली आहे. लाखनी तालुक्यातील गढपेंढरी येथील अशोक गायधने या शेतकऱ्याच्या शेतात रोवणीचे काम सुरू होते. शेतात रोवणी सुरू असताना जवळ असलेल्या पडक्या विहिरीत मजुरांना कासव दिसला.

विहिरीत पडलेले कासव पाहून मंगेश जय गोपाल गोंधुळे (मेंढा भुगाव) आणि दयाराम सोनीराम भोंडे (मेंढा भुगाव) आणि सुधीर मोरेश्वर हजारे हे तीन तरुण कासव काढण्यासाठी विहिरीत उतरले. मात्र विहिरीत गॅस असल्याने तिन्ही पुरुष मजुरांना गुदमुरू लागले. हा सर्व प्रकार मजूर महिलांना लक्षात येताच ओरडा ओरड केली.

एकाला वाचवण्यात यश...

मात्र त्यांना वाचवण्यासाठी कोणत्याही प्रकारचे साहित्य नसल्याने मजूर महिलांनी स्वतःच्या अंगावरचे कपडे (साडी) काढून त्यांचा दोर करून विहिरीत फेकले व त्यातील सुधीर मोरेश्वर हजारे या तरुणाचे प्राण वाचवले. मात्र या इतर दोघांचा या घटनेत दुर्देवी मृत्यू झाला. या काळीज पिळवटून टाकणाऱ्या घटनेने परिसरात हळहळ व्यक्त केली जात आहे. (Latest Marathi News)