शृंगेरी घाटात ट्रकचा भीषण अपघात! आगीचे भयानक लोळ; डोंगराला आग, ड्रायव्हरचा झाला जागीच कोळसा

योगेश काशिद, बीड प्रतिनिधी

Truck accident in Shringeri Ghat Beed : बीडच्या पाटोदा तालुक्यातील मुगाव मार्गे जाणाऱ्या शृंगेरी घाटात ऊसाचा मोकळा ट्रक (क्र. MH 42 B 8583) ब्रेक फेल झाल्यामुळे खोल दरीत कोसळून भीषण अपघात झाल्याची घटना रात्री ९ वाजण्याच्या सुमारास घडली. अपघातानंतर ट्रकने अचानक पेट घेतल्याने आगीचे भयानक लोळ उठले. ट्रकच्या आगीमुळे परिसरातील डोंगरालाही आग लागल्याची माहिती समोर आली आहे.

अपघाताची माहिती मिळताच मुगाव येथील युवक व सामाजिक कार्यकर्त्यांनी घटनास्थळी धाव घेतली. ट्रक अत्यंत खोल दरीत कोसळलेला असल्याने आणि आगीने रौद्ररूप धारण केल्यामुळे घटनास्थळी पोहोचणे कठीण झाले होते. प्राथमिक पाहणीत ट्रकचालक आढळून आला नव्हता; मात्र मुगाव येथील युवकांनी जवळ जाऊन पाहणी केली असता, चालक सागर सोमनाथ इंदलकर हा आगीत होरपळून मृत झाल्याचे दिसून आल्याची माहिती स्थानिकांनी दिली.

घटनेची माहिती मिळताच स्थानिकांनी आष्टी पोलीस ठाण्याला कळवले. त्यानंतर आष्टी पोलिसांनी घटनास्थळी धाव घेऊन पुढील तपास सुरू केला आहे. या भीषण अपघातामुळे परिसरात चिंतेचे वातावरण निर्माण झाले आहे. ट्रक खोल दरीत असल्याने आणि आग मोठ्या प्रमाणावर पसरल्यामुळे बचावकार्य व पाहणी करताना अडचणी येत आहेत.

नागरिकांनी घटनास्थळी गर्दी करू नये, आगीपासून सुरक्षित अंतर राखावे आणि पोलिसांना तपास व मदतीस सहकार्य करावे, असे आवाहन पाटोदा पोलीस प्रशासनाच्या वतीने करण्यात आले आहे.