Walmik Karad Beed : वाल्मिक कराडच्या दोन्ही मुलांची तब्बल १७ तास चौकशी, बीडमध्ये पोलिसांच्या तपासाला वेग

परळीतील व्यापारी महादेव मुंडे यांच्या हत्या प्रकरणाने जिल्ह्यात एकच खळबळ उडवली असतानाच तपासाला आता वेग आला आहे. दोन दिवसांपूर्वी या हत्येचा तपास करण्यासाठी नवीन विशेष SIT स्थापन करण्यात आली आहे. तसेच बीडच्या स्थानिक गुन्हे शाखेने गुरुवारी सायंकाळी सुमारे पाच वाजता परळी येथून पाच संशयितांना ताब्यात घेतले. त्यानंतर रात्रीपासून दुसऱ्या दिवशी पहाटेपर्यंत पोलीस अधीक्षक कार्यालयात या पाचही व्यक्तींची कसून चौकशी करण्यात आली.

या चौकशीत एक महत्त्वाची माहिती समोर आली असून, मिळालेल्या माहितीनुसार त्या पाच जणांपैकी दोन जण हे आरोपी वाल्मीक कराडची मुलं आहेत. सुशील कराड आणि श्रीगणेश कराड अशी त्यांची नावे असून, याप्रकरणी त्यांची तब्बल १७ तास चौकशी करण्यात आली. पोलिसांना या दोघांवर संशय असून, त्यामुळे त्यांची सखोल चौकशी करण्यात आली. चौकशीनंतर त्यांना नोटीस देत नातेवाईकांच्या ताब्यात देण्यात आले.

महादेव मुंडे यांच्या हत्येनंतर बीड जिल्ह्यातील राजकीय आणि व्यापारी वर्तुळात अस्वस्थता निर्माण झाली होती. या प्रकरणाचा तपास आता विशेष तपास पथक (SIT) करत असून, पथकाचे प्रमुख आयपीएस पंकज कुमावत हे बीडमध्ये दाखल झाले आहेत. तपासाच्या दृष्टीने हे एक महत्त्वाचे पाऊल मानले जात आहे.

वाल्मीक कराडच्या दोन्ही मुलांची अटक होण्याची शक्यता आता अधिक बळावली आहे. गुन्हा घडल्यापासून अनेक तर्कवितर्क लावले जात होते, मात्र पोलिसांकडून अधिकृत माहिती मिळत नसल्याने वातावरणात संभ्रम होता. आता तपास अधिक गंभीर आणि निर्णायक टप्प्याकडे वाटचाल करत आहे. महादेव मुंडे हत्या प्रकरणातील अनेक धागेदोरे हाती लागल्याची शक्यता वर्तवली जात असून, पुढील काही तासांत मोठा खुलासा होण्याची शक्यता नाकारता येत नाही.