Beed News : सुनेच्या हत्येनंतर सासूचाही संशयास्पद मृत्यू, धक्कादायक घटनेनं बीड जिल्ह्यात खळबळ

विवाहित महिलेला जबरदस्ती विष पाजून तिची हत्या केल्याची धक्कादायक घटना बीडच्या गेवराई तालुक्यातील जोडवाडी येथे घडली होती. याप्रकरणी चकलांबा पोलिसांनी मृत महिलेच्या सासरकडील मंडळींवर गुन्हा दाखल केला होता. ही घटना ताजी असतानाच आता मृत महिलेच्या सासूचाही संशयास्पद मृत्यू झाला. यामुळे परिसरात एकच खळबळ उडाली.

पोलिसांनी महिलेचा मृतदेह ताब्यात घेतला असून तिचा मृत्यू नेमका कशामुळे झाला? याचा शोध सुरू केला आहे. मिळालेल्या माहितीनुसार, जोडवाडी येथील विवाहिता प्रतीक्षा कोकाटे या विवाहित महिलेची तिच्या सासरकडील मंडळींनी विष पाजून हत्या केली.

लग्नात मान पान दिल्याच्या कारणावरून सासरच्या प्रतीक्षाला विष देऊन मारलं. याप्रकरणी प्रतीक्षा कोकाटे हिचा भाऊ हर्षद संतोष कळंबे यांच्या फिर्यादीवरून पोलिसांनी मृत महिलेचा पती संदीप कोकाटे, सासरा सखाराम कोकाटे आणि मयत सासू कुंता कोकाटे या तिघांच्या विरोधात गुन्हा दाखल केला.

दरम्यान, गुन्हा दाखल होताच सासूचाही संशयास्पद मृत्यू झाल्याचं समोर आलं. प्रतीक्षा हिची सासू कुंता कोकाटे यांचा संशयास्पद मृत्यू झाल्याने गेवराईचे पोलीस उपअधीक्षक नीरज राजपूत यांनी यांनी घटनास्थळाला भेट देऊन तपासाची चक्र हलवली. यावेळी मोठ्या संख्येने पोलीस गावात दाखल झाले होते.