Crime News : तरुणाने लैंगिक अत्याचार केले, धर्मांतरासाठी दबाव टाकला; बीडमधील महिलेसोबत भयंकर घडलं

योगेश काशीद, बीड

Beed Ambajogai Women Rape Case News नाशिकच्या नामांकित TCS कॉरपोरेट कंपनीतील लैंगिक छळ आणि धर्मांतराची घटना ताजी असताना आता बीड मधून धक्कादायक बातमी समोर आली आहे. लग्नाचे स्वप्न दाखवून एका २८ वर्षीय महिलेवर दोन वर्षांपासून शारीरिक अत्याचार केल्याची धक्कादायक घटना अंबाजोगाई शहरात उघडकीस आली आहे. या प्रकरणी पीडितेने दिलेल्या फिर्यादीवरून सलमान अजीज पठाण याच्याविरुद्ध फसवणूक, अत्याचार आणि धमकी दिल्याप्रकरणी गुन्हा दाखल करण्यात आला आहे. आरोपीने पीडितेला लग्नासाठी धर्मांतराची सक्ती केल्याचे तक्रारीत नमूद असून सध्या तो फरार आहे.

मिळालेल्या माहितीनुसार, मूळची लातूर जिल्ह्यातील चाकूर येथील रहिवासी असलेली पीडित महिला सध्या अंबाजोगाई येथे वास्तव्यास आहे. आरोपी सलमान पठाण याने तिला लग्नाचे स्वप्न दाखवून दोन वर्षांपूर्वी आपल्या जाळ्यात ओढले आणि तिच्याशी शारीरिक संबंध प्रस्थापित केले. मात्र, जेव्हा पीडितेने विवाहाचा विषय काढला, तेव्हा आरोपीने तिची फसवणूक करण्यास सुरुवात केली.

त्याने पीडितेसमोर मुस्लिम धर्म स्वीकारल्याशिवाय लग्न करणार नाही अशी अट घातली. इतकेच नव्हे तर 'तुला जे करायचे आहे ते कर' असे म्हणत त्याने तिला शिवीगाळ करून जीवे मारण्याची धमकीही दिली. या प्रकरणी पीडितेच्या तक्रारीवरून अंबाजोगाई शहर पोलिसांनी भारतीय न्याय संहितेच्या कलम ६९, ३५२ आणि ३५१(२) अन्वये गुन्हा नोंदवला आहे.

एका महिलेच्या असहायतेचा फायदा घेऊन तिच्यावर धर्मांतरासाठी दबाव आणल्याच्या या घटनेमुळे परिसरात तीव्र संताप व्यक्त होत आहे. पोलीस निरीक्षक शरद जोगदंड यांच्या मार्गदर्शनाखाली सहपोलिस निरिक्षक जाधव या प्रकरणाचा पुढील तपास करत आहेत. शहर पोलीस फरार आरोपी सलमान पठाण याचा शोध घेत आहेत.