बीआरएस पक्षाच्या नेत्यासह त्यांच्या पत्नीला गोळ्या झाडून हत्या करण्याची धमकी दिल्याचा खळबळजनक प्रकार बीडमध्ये समोर आला आहे. निनावी पत्राद्वारे, 'बीआरएस पक्षाचे काम थांबव, अन्यथा तुझा दाभोलकर करू', अशी धमकी बीडच्या गेवराई येथील माजी जिल्हा परिषद सभापतीचे पती तथा बीआरएसचे नेते बाळासाहेब मस्के आणि त्यांच्या पत्नी मयुरी मस्के यांना देण्यात आली आहे. (Latest Marathi News)
तुम्ही दोघे नवरा - बायको गेवराई तालुक्यात शिबीर घेऊन आमच्या नेत्यांचे खच्चीकरण करत आहात. त्यामुळे बीआरएसचे काम थांबव, अन्यथा गोळ्या घालून दाभोलकर करु, अशी धमकी बाळासाहेब मस्के व पत्नी मयुरी खेडकर - मस्के यांना निनावी पत्राद्वारे देण्यात आल्याने तालुक्यात मोठी खळबळ उडाली आहे.
या पत्रात अत्यंत खालची भाषा वापरून खोट्या केसेसमध्ये अडकवून तुरुंगात टाकण्याची धमकी देखील देण्यात आली आहे. याप्रकरणी बाळासाहेब मस्के यांनी माझ्यासह माझ्या कुटुंबातील सदस्यांच्या जिवीतास धोका असल्याची तक्रार दिल्यानंतर अज्ञात व्यक्तीविरोधात गेवराई पोलीस ठाण्यात गुन्हा दाखल करण्यात आला आहे.
बीआरएस पक्षाच्या गेवराई विधानसभा समन्वयक मयुरी मस्के व बी.एम. प्रतिष्ठाणचे अध्यक्ष बाळासाहेब मस्के हे सध्या गेवराई तालुक्यात गाव तेथे आरोग्य शिबीर घेत आहेत. या शिबिराला गावोगाव मोठा प्रतिसाद मिळत असून हजारो लोक शिबिराचा लाभ घेत असल्याचे दिसत आहे.
निनावी पत्रात काय म्हटलं?
त्यामुळं या निनावी पत्रात बाळासाहेब मस्के यांना खालच्या पातळीवरील भाषा वापरत 'तू बीआरएस पक्षात जाऊन जास्त माजलास का, तुला जास्त झालय का, तू गावोगाव शिबीर घेऊन आमच्या नेत्यांचं खच्चीकरण करत आहे. त्यामुळे तू करत असलेलं राजकारण बंद कर, अन्यथा आमच्या नेत्याचा आदेश आल्यावर तुला गोळ्या घालून तुझा दाभोलकर करु', अशी धमकी देऊन अत्यंत खालची भाषा वापरली आहे.
दरम्यान, याप्रकरणी बाळासाहेब मस्के यांनी तक्रार दिल्यानंतर अज्ञात व्यक्तीविरोधात गेवराई पोलिस ठाण्यात गुन्हा दाखल करण्यात आला आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.