Satish Bhosale : खोक्या बीडहून प्रयागराजला पोहचलाच कसा? सतीश भोसलेला कुणी आश्रय दिला?

भरत मोहळकर, साम टीव्ही, प्रतिनिधी

भाजप आमदार सुरेश धसांचा निकटवर्तीय असेलल्या खोक्या भोसले प्रयागराजमधून जेरबंद केला. त्याला बीड पोलिसांच्या ताब्यात देण्यात आलंय. मात्र बीड जिल्ह्यातील शिरुर ते प्रयागराज हा प्रवास खोक्याने कसा केला आणि 6 दिवस खोक्या पोलिसांना कसा गुंगारा देत होता? त्याची माहिती समोर आलीय.

सहा दिवस खोक्या होता कुठे ?

- दुसरा गुन्हा दाखल झाल्यावर खोक्याने शिरुरमधून पुण्याच्या दिशेने पळ काढला

- पुण्यात वेगवेगळ्या ठिकाणी 2 दिवस मुक्काम

- पुण्यातून शिरुर कासारच्या बॉर्डरवर माध्यमांना प्रतिक्रीया

- तिसऱ्या दिवशी अहिल्यानगरमध्ये मुक्काम

- अहिल्यानगरहून संभाजीनगरमध्ये दाखल

- संभाजीनगरमध्ये मुक्काम करुन ट्रॅव्हल्सने प्रयागराजला रवाना

- विमानाने पलायन करण्याच्या तयारीतील खोक्याला प्रयागराजमध्ये बेड्या

अमानुष मारहाण, पैशांची उधळपट्टी, हेलिकॉप्टरमधून केलेला माज आणि वन्यजीवांची कत्तल यामुळे खोक्या अडचणीत आला. याच कारनाम्यामुळे खोक्याला बेड्या ठोकण्यात आल्या आहेत. त्यानंतर आता खोक्या आणि त्याच्या बोक्याला कोणत्याही परिस्थितीत ठोकणार असल्याचा इशारा मुख्यमंत्री देवेंद्र फडणवीसांनी दिलाय.

खोक्या 6 दिवस पोलिसांना गुंगारा देत होता.. दरम्यान तो पुणे, अहिल्यानगर, संभाजीनगर ते प्रयागराज हा प्रवास कुणाच्या आशीर्वादाने करत होता? फरार असलेला खोक्या माध्यमांपर्यंत कसा पोहचला? खोक्याला वाचवणारा आणि तो फरार असतानाही दिशा दाखवणारा आका कोण? याचा सखोल तपास होणार का? आणि खोक्याच्या आकालाही जेरबंद केलं जाणार का? याकडे लक्ष लागलंय.