Accident News : बीडमध्ये मोठी दुर्घटना! विहिरीमध्ये ड्रिलिंग करताना दोन कामगारांचा जागीच मृत्यू

योगेश काशिद, बीड

बीडच्या माजलगाव तालुक्यातील जय महेश शुगर फॅक्टरी परिसरात शुक्रवारी भीषण दुर्घटना घडली. कारखान्याच्या आवारातील विहिरीमध्ये आडवे होल (ड्रिलिंग) करण्याचे काम सुरू असताना अचानक झालेल्या अपघातात दोन कामगाराचा मृत्यू झाला असून तीन जण गंभीर जखमी झाले आहेत. या घटनेमुळे संपूर्ण परिसरात खळबळ उडाली असून कारखाना प्रशासनाच्या निष्काळजीपणावर प्रश्नचिन्ह उपस्थित केले जात आहे.

मिळालेल्या माहितीनुसार, विहिरीमध्ये मशीनच्या सहाय्याने काम सुरू होते. कामादरम्यान अचानक तांत्रिक बिघाड झाल्याने मोठा अपघात घडला. घटनेवेळी काही कामगार विहिरीमध्ये उतरून काम करत होते. अचानक झालेल्या दुर्घटनेत एका कामगाराचा जागीच मृत्यू झाला, तर अन्य तीन जण गंभीर जखमी झाले.जखमींना तातडीने उपचारासाठी जवळच्या रुग्णालयात दाखल करण्यात आले असून त्यांच्यावर अतिदक्षता विभागात उपचार सुरू असल्याची माहिती मिळाली आहे. जखमींची प्रकृती चिंताजनक असल्याचे सांगण्यात येत आहे.दरम्यान, या घटनेनंतर कारखाना प्रशासनाविरोधात संताप व्यक्त केला जात आहे.

विहिरीसारख्या धोकादायक ठिकाणी काम सुरू असताना आवश्यक सुरक्षा उपाययोजना करण्यात आल्या होत्या का? कामगारांना सुरक्षासाहित्य देण्यात आले होते का? याबाबत गंभीर प्रश्न उपस्थित होत आहेत. स्थानिक नागरिक व कामगारांनी कारखान्याच्या हलगर्जीपणामुळेच हा निष्पाप जीव गेल्याचा आरोप केला आहे. तसेच संबंधित वाहन व मशीन मालकाच्या निष्काळजीपणामुळे दुर्घटना घडल्याची प्राथमिक शक्यता व्यक्त होत आहे. काम सुरू करण्यापूर्वी तांत्रिक तपासणी झाली होती का, याचाही तपास सुरू करण्यात आला आहे.

घटनेची माहिती मिळताच पोलिसांनी तातडीने घटनास्थळी धाव घेतली. पोलिसांकडून पंचनामा करण्यात येत असून संपूर्ण घटनेचा तपास सुरू आहे. दुर्घटनेमागील नेमके कारण शोधण्याचे काम सुरू असून जबाबदारांवर कारवाई होण्याची शक्यता व्यक्त केली जात आहे. या भीषण दुर्घटनेमुळे मृत कामगाराच्या कुटुंबावर दुःखाचा डोंगर कोसळला आहे. परिसरात हळहळ व्यक्त केली जात असून दोषींवर कठोर कारवाई करण्याची मागणी जोर धरत आहे.