Beed : टॉवर कोसळला अन् डाव मोडला; चोरी करताना दोघांचा दुर्दैवी मृत्यू; नेमकं काय घडलं?

बीडच्या केज तालुक्यात धक्कादायक घटना घडली आहे. केजमध्ये उभारण्यात आलेल्या हाय व्होल्टेज टॉवरवर चढून तार चोरीचा प्रयत्न करताना दोन चोरट्यांचा मृत्यू झाला आहे. यानंतर या चोरट्यांच्या टोळीतील इतर सदस्यांनी रस्ते अपघाताचा बनाव केला. मात्र चोरी कधीच लपून राहत नाही म्हणतात ते अगदी खरं आहे. चोरट्यांचा डाव फसला आणि मृत झालेल्या दोघांच्या मृत्यू मागचं कारण समोर आलं.

मिळालेल्या माहितीनुसार, अविनाश पाटोळे आणि आकाश आडे अशी मृत्यू झालेल्या दोन चोरट्यांची नावे आहेत. अविनाश पाटोळे, आकाश आडे आणि त्यांचे साथीदार आकाश पेठे, दीपक भगत व वैभव आदत यांच्यासह पुणे येथून केज तालुक्यात आले होते. त्या ठिकाणी नांदूर घाट शिवारात असलेल्या हाय व्होल्टेज टॉवरवर त्यांची नजर गेली. या टॉवरवर चढून त्यांनी तार चोरी करण्याचा प्लॅन केला. प्लॅननुसार अविनाश पाटोळे आणि आकाश आडे टॉवरवर चढले.

त्याचवेळी टॉवर कोसळल्याने अविनाश पाटोळे आणि आकाश आडे या दोघांचा मृत्यू झाला. त्यानंतर इतर साथीदारांनी त्या दोघांचे मृतदेह एका कारमध्ये टाकून परभणीकडे पळ काढला. त्या ठिकाणी इतर साथीदारांनी हे मृतदेह गाडीतच सोडून पलायन केले.

यानंतर गाडीच्या चालकाने हे मृतदेह ॲम्बुलन्सच्या मदतीने रुग्णालयात दाखल केले आणि चोरट्यांचा डाव मोडला. मृतांच्या नातेवाईकांना ही बाब समजल्यानंतर हा सर्व प्रकार उघडकीस आला. दरम्यान यानंतर परभणी व केज पोलिसांनी घटनास्थळी भेट दिली असून अधिक तपास पोलीस करत आहेत.