Baramati Politics: पवार विरुद्ध पवार संघर्ष; बारामतीच्या मैदानात पवार बंधू आमनेसामने?

भरत मोहळकर, साम प्रतिनिधी

विधानसभा निवडणुकीपूर्वीच अजित पवारांनी बारामतीतून न लढण्याचे स्पष्ट संकेत दिलेत. त्यापार्श्वभूमीवर अजित पवारांचा मुलगा जय पवार यांनी बारामतीत भेटीगाठीच्या माध्यमातून वातावरण तापवायला सुरुवात केलीय.तर शरद पवारांच्या पक्षाचे अजित पवारांचे पुतणे युगेंद्र पवारांनी बारामतीतून स्वाभिमान यात्रेला सुरूवात केलीय. त्यामुळे बारामतीत पवारा बंधूंमध्ये सामना रंगण्याची शक्यता दिसतेय.

अजित पवारांनी बारामतीतून लढण्यास इच्छूक नसल्याचे दुस-यांदा संकेत दिले आहेत. त्यामुळे त्यांचा लहान मुलगा जय पवारांनी गणेशोत्सवाच्या निमित्तानं गणेश मंडळाच्या गाठीभेटी घेऊन तयारी सुरू केल्याचं बोललं जातंय.

अजित पवारांनी बारामती सोडण्याचे संकेत देताच आता जय पवारांनी मतदारसंघात जनसंपर्क वाढवायला सुरुवात केलीय. त्यातच गणेश मंडळांना भेटी देत आरती करत जय पवार बारामती पिंजून काढत आहेत. दुसरीकडे लोकसभेला सुप्रिया सुळेंसाठी प्रचाराची धुरा सांभाळणाऱ्या युगेंद्र पवारांनाही खुद्द शरद पवारांनीच ताकद द्यायला सुरुवात केलीय.

त्यामुळे लोकसभेनंतर पुन्हा विधानसभेला पवार बंधुंमध्ये लढत होण्याची शक्यता आहे. तर या लढतीत पुन्हा एकदा शरद पवार आणि अजित पवार यांची प्रतिष्ठा पणाला लागणार आहे. त्यामुळे पवार काका-पुतण्यात लढत रंगणार की पवार बंधू आमनेसामने येणार याबाबत उत्सुकता वाढलीय.