Baramati Accident: भरधाव कारचा टायर फुटला, अपघातामध्ये काँग्रेस नेत्याच्या मुलाचा दुर्दैवी मृत्यू

मंगेश कचरे, इंदापूर

बारामतीमधून भीषण अपघाताची (Baramati Car Accident) घटना समोर आली आहे. भरधाव कारचा टायर फुटून अपघात झाला. या अपघातामध्ये इंदापूरमधील काँग्रेस (Congress) नेत्याच्या मुलाचा मृत्यू झाला. बारामती तालुक्यातील रूई येथे ही अपघाताची घटना घडली. याप्रकरणी इंदापूर पोलिसांकडून तपास सुरू आहे.

मिळालेल्या माहितीनुसार, बारामती तालुक्यातील संत तुकाराम महाराज राष्ट्रीय महामार्गावर भीषण अपघात झाला. रुई गावाच्याहद्दीत भरधाव कारचा टायर फुटला आणि अपघात झाला. या अपघातामध्ये इंदापूर तालुक्यातील सणसर गावातील तरुणाचा मृत्यू झाला. आदित्य आबासाहेब निंबाळकर असे या तरुणाचे नाव आहे. आदित्य इंदापूर तालुका काँग्रेसचे अध्यक्ष आबासाहेब निंबाळकर यांचा मुलगा आहे.

मंगळवारी सायंकाळी चारच्या सुमारास बारामती तालुक्यातील रुई गावच्या पाटीनजीक हा अपघात घडला. प्रत्यक्षदर्शिंनी दिलेल्या माहितीनुसार, आदित्य हा काटेवाडीकडून रुई मार्गे बारामतीत येत होता. त्याच्या कारचा अचानक टायर फुटला आणि कार पलटी झाली. ही कार एका इमारतीच्या कडेला जाऊन आदळली.

हा अपघात इतका भीषण होता की यामध्ये कारचा चक्काचूर झाला आहे. या अपघातामध्ये आदित्य गंभीर जखमी झाला. स्थानिकांनी त्याला तात्काळ रुग्णालयात दाखल केले. पण उपचारादरम्यान त्याचा मृत्यू झाला. आदित्यच्या मृत्यूमुळे निंबाळकर कुटुंबीयांवर दु:खाचा डोंगर कोसळला आहे.