Assembly Election: बच्चू कडूंचा डाव, महायुतीचा पाडाव? विधानसभेसाठी करणार शेतकऱ्यांशी आघाडी

भरत मोहळकर, साम प्रतिनिधी

विधानसभा निवडणूक तोंडावर आल्याने सर्वच पक्ष कामाला लागलेत. त्यातच महायुती आणि महाविकास आघाडीला मित्रपक्षांना सोबत ठेवताना मोठी कसरत करावी लागतीय. मात्र आता महायुतीचा घटकपक्ष असलेल्या बच्चू कडूंनी आता महायुतीचं टेंशन वाढवणारा निर्णय घेतलाय. बच्चू कडूंनी एका वृत्तवाहिनीशी बोलताना थेट शेतकरी नेते राजू शेट्टी, रवीकांत तुपकरांसह मराठा आंदोलक मनोज जरांगेंनाही साद घालत तिसऱ्या आघाडीचे संकेत दिलेत..

शेतकऱ्यांच्या प्रश्नासंदर्भात बच्चू कडू 9 ऑगस्टला क्रांती दिनी छत्रपती संभाजीनगरमधून सरकारविरोधात एल्गार पुकारणार आहेत. त्यानंतर आपली भूमिका ठरवणार असल्याचंही बच्चू कडूंनी म्हटलंय. राज्यातील सत्तांतरापासून बच्चू कडूंना मंत्रिपदाची आशा होती. मात्र विधानसभा निवडणूक आली तरी बच्चू कडूंना मंत्रिपदापासून उपेक्षित रहावं लागलं. त्यातच लोकसभा निवडणूकीपासून बच्चू कडूंचे सूर बदलले आहेत. त्यामुळे बच्चू कडूंनी राज्यात शेतकऱ्यांची आघाडी स्थापन करून मनोज जरांगेंसह मोट बांधली तर महायुतीचं टेंशन वाढणार आहे. त्यामुळे बच्चू कडूंनी केलेल्या आवाहनाला जरांगेंसह शेतकरी नेते काय प्रतिसाद देतात? यावरून आगामी काळातील सत्तेचं समीकरण ठरणार आहे.