Chhatrapati Sambhajinagar: अत्यंत वेदनादायी! निर्दयी आई-वडिलांनी नवजात अर्भकाला पोत्यात भरून उसाच्या शेतात सोडलं

Chhatrapati Sambhajinagar Crime News:

छत्रपती संभाजीनगर शहराजवळील एमआयडीसी वाळूज पोलीस ठाण्याच्या हद्दीत एकलेहरा यथील उसाच्या शेतात नवजात पुरूष जातीचे अर्भक जखमी अवस्थेत शेतात काम करणाऱ्या शेतकऱ्यांना आढळून आले. पोलिसांनी नवजात आर्भकाला सुरक्षितपणे बजाजनगर येथील आष्टविनायक रुग्णालयात दाखल केले.

एमआयडीसी वाळूज पोलिस ठाण्याच्या हद्दीत असणाऱ्या एकलेहारा येथील अनिल शिंदे यांच्या मालकीच्या शेतामध्ये नवजात अर्भक रडत असल्याचा आवाज शेजारील शेतात काम करणाऱ्या रुक्मणबाई गांगरडे याना आला. त्या तत्काळ ही माहिती अनिल यास दिली. अनिलने पुढे होऊन पाहणी केली असता, एका सिमेंटच्या टाकाऊ गोणीच्या पोत्यावर नुकतेच जन्मलेले अर्भक त्यांना दिसले. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

अनिल यांनी तत्काळ ही माहिती एमआयडीसी वाळूज पोलिसाना दिली. माहिती मिळताच वरिष्ठ पोलीस निरीक्षक अविनाश आघाव यांच्या मार्गदर्शनात पोलिसांनी घटनास्थळी धाव घेत अर्भकाला पोलीस व्हॅनमध्ये बजाजनगर येथील रुग्णालयात दाखल केलं.  (Latest Marathi News)

पोलीस बनले पालक

मिळालेल्या माहितीनुसार, बाळाच्या गळ्यावर, पायावर आणि डाव्या हाताच्या मनगटावर किरकोळ जखमा असल्याचे आढळून आले. पुढे डॉक्टरांच्या सांगण्यावरून फौजदार शिंदे यांनी बाळासाठी दोन जोडे ड्रेस, पांघरून, दूध आणि औषधी खरेदी केली. तर, महिला कर्मचारी संगीता वैद्य यांनी बाळाला मायेने कुशीत घेऊन दूध पाजले. नुकतेच जन्माला आलेले अर्भक पोलिसांनी ताब्यात घेतले, तेव्हापासून भुकेमुळे व्याकूळ होऊन रडत होते. महिला पोलीस कर्मचाऱ्याने जवळ घेऊन दूध पाजताच बाळ शांत झाले. वर्दीच्या आतील माणुसकी पाहून रुग्णालयातील नागरिक आवक होऊन बघत होते.

पोलिसांनी परिसराची बारकाईने पाहणी केली असता त्यांना ज्या ठिकाणी बाळ आढळून आले, त्या ठिकाणापासून अवघ्या १०० मीटरच्या अंतरावर नांदेडा येकलहरा मार्गावर रस्त्यात रक्त सांडल्याचे आढळून आले. त्यावरूनच पोलिसांनी सदरील माता या ठिकाणी प्रसूत झाली असावी, असा अंदाज वर्तविला. तुर्तास सर्व कायदेशीर प्रक्रिया पूर्ण करण्यात येणार असणून त्यानंतर गुन्हा दाखल करुन आर्भकाला टाकून देणाऱ्या निर्दयी आई-वडिलांचा शोध घेतला जाणार असल्याचे पोलिसांनी सांगितले.